گئرهارد دورفر
گئرهارد دؤرفئر (1920-2003) ـ آلمان تورکولوقو.
یاشاییشی[دَییشدیر]
گئرهارد دؤرفئر 1920 اینجی ایلین مارس آیینین 8 اینده او زامانکی کؤنیگسبئرگ دییلن بوگونکو کالئنینگراد ( کالئنینگراد بوگون روسیه فدراسیونونا عایید دیر) شهرینده دونیایا گؤز آچاراق اوشاقلیغینی اورادا کئچیردی. عاییله سی ایله بیرلیکده 1928اینجی ایلده بئرلین شهرینه کؤچدو. 1938-1946 ایللرینده آلمان ایداره ایشینده مشغول و عسگرلیک ائده رک 1946 آلمان گوجلری متفقلر قارشیسیندا شکست یئدیکده ساواش دوستاغی اولدو. دوستاقدان گئری دؤندوکدن سونرا 1949-1954 اینجی ایللرده غربی آلمانیانین بئرلین شهرینده تورکولوقی و آلتائیستیک بؤلومونو کارل هاینریش مئنگئس یانیندا، ایسلام شناسلیغی ر. هارتمان و و-براونئ یانیندا، ایرانشناسلیق بؤلومونو او-هانسئن و باشقالارینین یانیندا سونرا چاتدیراراق 1954 اینجی ایلده دوکتورا تئزینی موغوللارین گیزلی تاریخی اوزره یازاراق دوکتورا تحصیلینی اوخودوغو اوچ بؤلومده مۆدافیعه ائتدی.
1955-1957 اینجی ایللرده ماینز اونیوئرسیته سینین علم و ادبیات بؤلومونده بیراؤیره تیجی همکار اولاراق چالیشدی.. 1960 اینجی ایلده پروفسورلوغونو آلمانیانین گؤتینگئن شهرینده تورکولوقی زمینه سینده مۆدافیعه ائتدی. 1966 اینجی ایلدن گؤتینگئن شهرینین گئورگ آگوست اونیوئرسیته سی نین پروقراملارینین خاریجینده پروفسورلوق ایله مشغول اولدو. 1966-1968 اینجی ایللرده بیر قوناق پروفسور اولاراق بلومینگتون اونیوئرسیته سینده آمریکا بیرلشمیش شتاتلاریندا چالیشدی. 1968، 1969 و 1973 اینجی ایللرده ایرانداکی خلج و خوراسان تورکلرینین دیللرینی آراشدیرماق اۆچون بیرر علمی هیئت ایله ایرانا عملی گزیلر دوزنله دی. 1970 اینجی ایلدن اونا آییرد ائدیلمیش تورکولوقی و آلتائیستیک زمینه لرینده گئورگ آگوست اونیوئرسیته سینده پروفسورلوق ایله مشغول اولدو. 1975-1976 تحصیل ایلینده یاریم ایللیک سئمینارلار دوزنله مک اۆچون استانبول اونیوئرسیته سینده بیر قوناق پروفسور اولاراق چالیشدی. 1988 اینجی ایلده امکلیگه آیریلدی. امکلیگه آیریلماسینا باخمایاراق 2001 اینجی ایله دک گؤتینگئن شهرینین گئورگ آگوست اونیوئرسیته سینده ایران تورکلری (گونی آذربایجان، خلج و خوراسان تورکلری اوزره سئمینارلار دوزنله دی)، یاقوتجا و ساییره اوزره درس وئرمه گه داوام ائتدی. 23 دسامبر 2003 اینجی ایلده اؤز دونیاسینی ده گیشه رک تورپاغا قوووشدو.
قایناقلار[دَییشدیر]
- ایشیق سؤنمز، پروفسور گئرهارد دؤرفئردن خاطراتیم ایله اونون اؤزکئچمیشی.