حیات (قزئت)

ویکی‌پدیا، آچیق بیلیک‌لیک‌دن
پرش به ناوبری پرش به جستجو

حیات


سوروملو مودور علی بیگ حسین‌زاده
باش یازار احمد بیگ آغا اوغلو
یاییلان ایللر 1905-1906
دیل آذربایجان تورکجه‌سی
موضوع ایجتیماعی، سیاسی، ایقتیصادی ، ادبی
باغلانما سببی سانسور کومیته‌سی طرفیندن
بوتون سایلار 325

"حيات"آذربايجان مطبوعات تاريخينده موهوم رولو اولموش گونده‌ليک ايجتيماعي-سياسي، ايقتيصادي و ادبي قزئت.

تاريخي[دَییشدیر]

1905.جي ايل يانوارين 9-دا پئتئربورقدا چارا عريضه ايله موراجيعت ائتمگه توپلاشميش دينج نوماييشچيلرين گوللـه‌باران ائديلمه‌سي ايله باشلايان و بوتون روسیه اراضيلرينه ياييلان اينقيلاب ايري صنايع مرکزلريندن اولان باکيدا دا جيدي اعتيراضلارلا سياسي گرگينليکلرله موشاييعت اولونوردو. شهرده تعطيل و نوماييشلر باشلادي.

"حيات" قزئتي نشره 1905-جي ايل اييونون 7-ده باشلادي. "حيات"-ين فعاليته باشلاديغي ايلک ايکي آيدا - اييون و اييول آيلاريندا باکيداکي صنايع موسيسه‌لري‌نین دؤرد حيصه‌سيني تعطيل بورودو. چار قورولوشو ايداره‌سي‌نین ضعیفله‌مه‌سيندن ايستيفاده ائدن تيفليس و باکيدا اؤزلري‌نین سياسي مرکزلريني ياراتميش داشناکسیون پارتياسي‌نین عوضولري و ائرمني میلّي شوراسي‌نین نوماينده‌لري آچيق-آشکار يئرلي موسلمان اهاليسينه، آذربايجان خالقينا قارشي تئررور و تخريبات تؤره‌ديرديلر. ائرمنيلرين باکيدا، ناخچيواندا، قاراباغدا و زاقافقازييا‌نین آذربايجانليلار ياشايان حيصه‌سينده تؤرتديکلري قتل عاملار سيستئملي شکيل آلميشدي.

1905.جي ايلين فئورال آيي‌نین ايلک اون‌گونلوگونده باکيدا قيرغينلار تؤره‌ديلدي، دينج اهالي دهشتلي گونلر ياشادي. بئله بير آغير شراييطدن چيخماق اوچون اينفورماسيا و تبليغات واسيطه‌سينه جيدي ائحتياج وار ايدي. زاما‌نین طلبلرينه اويغون اولاراق، گونده‌ليک قزئت نشر ائتمک مسله‌سي آذربايجان ضياليلاريني دوشوندوروردو. 1905-جي ايلين مارتين 15-ده آذربايجان خالقي‌نین حياتيندا گئنيش فعاليت اسفئراسي ايله درين ايز بوراخميش، خئیریه‌چی حاجي زین‌العابدین تاغي‌يئوين منزيلينده توپلاشميش ضياليلار بير چوخ اؤنملي مسله‌لر کيمي گونده‌ليک قزئت نشر ائتمگي ده موذاکيره ائتديلر.

ايلک نؤمره‌سي[دَییشدیر]

1905.جي ايل آپرئلين 16-دا دؤورون گؤرکملي ضياليلاري علی بیگ حسین‌زاده و احمد بيگ آغااوغلو پئتئربورق باش مطبوعات ايداره‌سينه "حيات" آدلي قزئت نشر ائتمک ايستگيني عريضه ايله بيلديرديلر. ح.ز.تاغي‌يئوين بؤيوک نوفوذو و ايشه‌‌قاريشماسي ايله 1905-جي ايل آپرئلين 22-ده قافقاز جانيشيني ووْروْنتسوْو داشکوْو "حيات"-ين نشرينه ايجازه وئردي. لاکين "حيات"-ين ايدئيا-سياسي مضمونو ايکي‌قات سانسورا معروض قالدي. بئله‌کي،قزئتين درج ائتديگي موهوم اهميتلي يازيلار روس ديلينه ترجومه ائديليب. تیفلیس سانسور کوميته‌سينه گؤندريلدي. قزئتين مضمونو، ايدئيا ايستيقامتلري میلّي مؤوقئعده دايانان عليمردان بيگ توپچوباشوو (ناشير)، علی بیگ حسین‌زاده (باش رئداکتور) و احمد بيگ آغااوغلو (1905-جي ايلين آخيرلارينادک باش رئداکتور) طرفيندن حياتا کئچيريليردي.

ايلک نؤمره‌سي 1905-جي ايل 7 اييوندا، سونونجو نؤمره‌سي 1906-جي ايل 3 سئنتيابردا (جمعي 325 سايي) چيخميشدير. بونلاردان 131-اي 1905-جي، 194-او ايسه 1906-جي ايلده ايشيق اوزو گؤرموشدو. "حيات"-ين 101-جي سايي علی بیگ حسین‌زاده و احمد بيگ آغااوغلونون رئداکتورلوغو ايله چيخميشدير. بو تاريخدن اعتيباراً احمد بيگ آغااوغلو "ايرشاد" قزئتيني نشر ائتديرديگينه گؤره اوندان اوزاقلاشماق مجبوريتينده قالير، علی بیگ حسین‌زاده ايسه قزئتده‌کي فعاليتيني داوام ائتديرير.

نشرينه قارشي تضييقلر[دَییشدیر]

"حيات"آ قارشي تضييق و تهديدلر، سانسورون آغير شرطلري قزئتين نشري‌نین ايلک آيلاريندا اؤزونو آچيق بوروزه وئريردي. ايلک سايي‌نین چيخماسيندان آي ياريم سونرا ائرمني سانسورچولارين تحريکي ايله سانسور کوميته‌سي‌نین صدري قاللئل "حيات"-ين چاپي‌نین دايانديريلماسي اوچون قافقاز جانيشينليگينه موراجيعت ائتدي. سانسور کوميته‌سي قزئتي و اونون رئداکتورو احمد بيگ آغااوغلونو "پان‌ايسلاميست ايدئيالارين آلوولو پرستيشکاري" ،"بوتون موسلمانلارين خليفه‌سي ساييلان تورک سولطا‌نی‌نين نوفوذ و قودرتي‌نین آرتماسي طرفداري" کيمي قلمه وئرديلر. ديگر طرفدن "حيات"-ين ياراديجي هئيتي "قاتي ايسلام طرفدارلاري" کيمي گوناهلانديريلير و آنتي-ائرمني تبليغاتي نتيجه‌سينده قافقازدا موسلمان فاناتيزمي‌نین آلوولاناجاغي ايديعا ائديليردي.

سانسور کوميته‌سي‌نین قافقاز جانيشينليگينه موراجيعتينده علی بیگ حسین‌زاده‌نین و احمد بيگ آغااوغلونون "ايسلامين تميزليگي و ايلکينليگيني قوروماق اوچون" چاريزمه و روسلارا قارشي باريشماز مؤوقئعده دايانماسي دا قئيد اولونوردو. ائرمنيلر علی بیگ حسین‌زاده‌نین و احمد بيگ آغااوغلونون رئال بير قووّه کيمي فورمالاشماسيندان قورخوردولار.

ايلک سايي و ياييلماسي[دَییشدیر]

"حيات"-ين ايلک ساييندا درج اولونان "قزئتيميزين مسلکي " سرلؤوحه‌لي مقاله‌ده مطبوعاتين خالقين حياتيندا، جمعيتين اينکيشافيندا اؤنمي قئيد اولونوردو: "باش مقاله‌ده گؤستريليردي کي، غرب اؤلکه‌لرينده، حتّي اهاليسي 4-5 ميليون نفر اولان اؤلکه‌لرده 300-400 قزئت بوراخيلير. مدني میلّتلر قزئتي "بشري ائحتياجلارين ان ضروريلريندن" ساييرلار. همين اؤلکه‌لرده اينسانلار قزئت اوخوماغي اؤيره‌نيبلر، چايسيز-چؤرکسيز دولانا بيلمه‌ديکلري کيمي، قزئتسيز ده کئچينه بيلميرلر. مطبوعاتين جمعيتين اينکيشافيندا، خالقين معاريفلنمه‌سي و ترقّيسينده‌کي رولو باره‌ده بئله قييمتلنديريليردي:

"اينسان اوچون مونيس بير يولداش، خئييرخاه بير موعلّيم، نافيذ بير مکتبدير، هم ده ذيلّتده قالانلارا دوغرو يولو، هيدايت يولونو گؤسترير".

"حيات" قزئتي تکجه قافقازدا دئييل، ائلجه ده، وولقابويوندا، ايراندا و تورکيه‌ده ده ياييليردي. علی بیگ حسین‌زاده "حيات" قزئتي و "فيوضات" درگيسي ايله آذربايجاندا میلّي مفکوره‌‌نین، تورکچولوک حرکاتي‌نین گئنيشلنمه‌سينده بؤيوک رول اويناميشدير. "حيات" قزئتي‌نین اساس مقصدي آذربايجانا، آذربايجان خالقينا و تورکچولوگه خيدمت ائتمک ايدي.

علی بیگ حسین زاده

علی بیگ حسین‌زاده‌نین عوموم‌تورک ادبي ديلي کونسئپسياسي[دَییشدیر]

نشري‌نین ايلک ساييندان سونرا "حيات" ديلي موذاکيره اوبيئکتينه چئوريلدي. قزئتينده ديل مسله‌لرينده علی بیگ حسین‌زاده‌نین سئچيمي فرقلي ايدي و بو ياناشما سيستئمي عوموم‌تورک ادبي ديل کونسئپسياسينا اساسلانيردي. آذربايجاندا عوموم‌تورک ادبي ديل کونسئپسياسيني اورتايا قويان، بو ايدئياني پراکتيکي باخيمدان اؤز اثرلرينده ايشله‌دن و مودافيعه ائدن علی بیگ حسین‌زاده ايدي. تورک خالقلاري‌نین میلّي-معنوي بيرليگينه نايل اولماق اوچون علی بیگ حسین‌زاده عوموم‌تورک ادبي ديلي‌نین قايدالاري‌نین ايشله‌نيب حاضيرلانماسي و اورتا مکتبلرده، مطبوعاتدا ايشلنمه‌سيني واجيب حئساب ائديردي. اورتاق تورک ديلي ايدئياسي ايله باغلي پولئميکا ييرمينجی عصرين اوّللرينده داها دا گوجلنميشدي. علی بیگ حسین‌زاده‌يه گؤره، ادبي ديل میلّتين مؤوجود اولماسي و ياشاماسي اوچون واجيب شرطلردن بيري ايدي. او، فيکريني اساسلانديراراق يازيردي:

" ادبي ديله ماليک اولمايان قؤوم موستقيل قؤوم صورتينده چوخ يازماز. ادبي ديلي اولمايان قؤوم ياشاماق و دونيا معيشتيني کئچمک اوچون اؤزوندن مدنيتلي، ادبي ديلي اولان بير قؤومون ديليني ايتخاذ ائتمگه مجبوردور. "

احمد بیگ آغا اوغلو

"حيات"-ين ياراديجي هئيتي[دَییشدیر]

"حيات" نشر اولوندوغو قيسا مودّتده آذربايجان ضياليلاريني و ادبي-ايجتيماعي و سياسي فيکير تاريخينده اؤزونه‌مخصوص يئر توتان شخصيتلريني اؤز اطرافيندا توپلادي. قزئتين 36 نفر دايمي يازار-مؤليفي وار ايدي. علی بیگ حسین‌زاده، احمد بيگ آغا اوغلو، حسن بيگ زردابي، عباس صحت، محمد هادي، ه.س.آيازوو، اوزئيير حاجي‌بيگوو، عبدالرحیم بیگ حاقوئردی‌یئو ، ميرزه علي اکبر صابير، نريمان نريمانوو، م.حاجينسکي، م.ه.شيخ‌زاده، سلطان مجيد غني‌زاده، آخوند ابوتراب اوغلو قزئتين دايمي يازارلاريندان ايدي.

م.ع.صابيرين مشهور "موسلمان و ائرمني وطنداشلاريميزا" شئعيري و "بير مجليسده اون ايکي کيشي‌نین صؤحبتي" ساتيراسي و باشقا اثرلري "حيات" قزئتينده چاپ اولونموشدور. صابيرين رئداکسيايا گؤندرديگي مکتوبوندا دئييليردي کي، شاعير بو شئعيري محمد حسن طاهرووون قزئتده چيخان مقاله‌سينده‌کي"هر بيريميز بو قزئته‌ني اوخويوب، ايستيقباليميز اوچون ايش گؤرمه‌لي‌یيک" شوعاريندان روحلاناراق يازميشدير. آذربايجان رومانتيک ادبياتي‌نین بانيلريندن اولان محمد هادي ايلک مطبوع اثرلريني "حيات"دا درج ائتديرميشدي. شاعيرين "بياني-حقيقت" آدلي مقاله‌سي قزئتين 1905-جي ايل 24 اييول تاريخلي ساييندا چاپ اولونموشدو. 1906-جي ايلده کوردميرده و سونرا هشترخاندا ايکن هادي بير-بيري‌نین آردينجا "حيات"آ مقاله و شئعيرلر گؤندرميشدي. بو يازيلاريندا شاعير معاريف و مدنيتي تبليغ ائدير، "علمي-ابدا"‌نین اينکيشافيندان دانيشير، آذربايجان ماحاللاري‌نین، اهالي‌نین مدني ايقتيصادي وضعيتيني تصوير ائتمگه چاليشيردي. "حيات"دا چاپ اولونموش "طلبه‌ليک خاطيراتيمدان" (1906-جي ايل آپرئل) شاعيرين ترجومئيي-حاليني، خوصوصيله اوشاقليق و گنجليک ايللريني اؤيرنمک مومکوندور. 1906- جي ايلدن اعتيباراً ايسه هادي "فيوضات" درگيسينده چاليشماغا باشلاميشدي. آذربايجان خالقي‌نین گؤرکملي اديبي عبدالرحیم بیگ حاقوئردی‌یئو حئکايه‌لريني "حيات"دا درج ائتديرميشدي. "آيين شاهيدليگي" ،"آتا و اوغول" حئکايه‌لري موختليف واختلاردا بو قزئتين صحيفه‌لرينده اوخوجولارا ارمغان ائديلميشدي.

ييرمينجی عصرين اوّللرينده آذربايجا‌نین مدني حياتيندا، ايجتيماعي-سياسي، بديعي-ائستئتيک فيکرين اينکيشافيندا شرفلي يئر توتموش اوزئيير حاجي‌بيگلي ده اؤز پوبليسيستيک يازيلاري ايله "حيات"دا اوخوجولارلا تماس قوروب. 1905-جي ايلده باکي‌يا کؤچن اوزئيير بيگ حاجي‌بيگلي "حيات"-ين 17 سئنتيابر 1905-جي ايل تاريخلي ساييندا "بير خانيم افندي‌نین بيزلره حوسني-توجهی" باشليقلي مقاله‌سي نشر اولونموشدور. بو مقاله اول پئتئربورقدا چيخان " Novoya vremya " ،سونرا ايسه باکيداکي روسجا نشر اولونان "باکو" قزئتينده ماقدا نئيمان آدلي ژورناليستين ائرمني-موسلمان دعواسينا حصر ائتديگي يازييا جاواب ايدي. م.نئيمان يازيسيندا آذربايجانليلار باره‌سينده بؤهتان يازميشدي. مثلا، او گؤسترميشدي کي، تئيمورلنگ اوردوسو نسليني (يعني آذربايجانليلاري) شيمالي آمئريکا‌نین "قيرميزي دري" وحشيلريني مدنيلشديرمک نامومکوندور... بو ييرتيجيلارين طبيعتي-جينسيتينه مدنيتين بير تاثيري اولارمي؟" حئيران‌ ائديجي جهت بودور کي، اوزئيير بيگ هله 20 ياشي تامام اولماميش م.نئيمان کيمي "ژورناليستلره" کسکين و توتارلي جاواب وئرميش، آذربايجان تورکلرينه آتيلان بو بؤهتاني بعضي میلّتلرين "تورک-ايسلام" بيرليگيندن قورخاراق اورتايا آتديقلاريني يازميشدي.

قئيد ائدک کي، او.حاجي بيگلي "حيات" قزئتينده 3 آي ترجومه‌چي کيمي ايشله‌ميش، سونرا فعاليتيني "ايرشاد" قزئتينده داوام ائتديرميشدي. ادبيات تاريخي‌نین تدقيقاتچيلاري طرفيندن "آذربايجانا ان چوخ خيدمت ائدن پئدوقوق" کيمي خاطيرلانان سلطان مجيد غنی‌زاده ده واخت‌آشيري پوبليسيست يازيلاري ايله "حيات"دا چيخيش ائديردي. "لوغتي-روسي تورکي" ،"روس ديلي‌نین ديلمانجي" ،"روس ديلي‌نین موعلّيمي" ،"اليفبايي-موتحريکي" ،"کيليدي-ادبيات" ،"لوغتي-تورکي و روسي" کيتابلاري‌نین مؤليفي اولان غنی‌زاده اؤلکه‌‌نین معاريفچي زومره‌سي‌نین تا‌نینميش سيماسي ايدي. ييرمينجی عصرين اوّللرينده س.م. غنی‌زاده‌نین درسليک و لوغتينه طلبات او قدر قووّتلندي کي، گنج ديلشوناس عاليم بو کيتابلاري تکميللشديريب، يئنيدن چاپ ائتديردي. "حيات" قزئتينده ديل موباحيثه‌لرينه قاتيلان س.م.غنی‌زاده بو مؤوضودا بير نئچه مقاله يازميشدي.

"حيات"-ين 10 نويابر 1905-جي ايل تاريخلي ساييندا "هانسي ديل ايله يازمالي" مقاله‌سينده علی بیگ جسین‌زاده‌نین عوموم‌تورک ديل کونسئپسياسينا قارشي چيخير، فيکيرلريني چوخ اينجه شکيلده اساسلانديريردي و شيرواندا "حيات"اي اوخويوب باشا دوشمه‌ین شيکايتچي‌نین ديلي ايله يازيردي:

" آ کيشي، ائله ديل ايله يازيرلار کي، اوخوياندا آدامين ديشلري تؤکولور. آخي موحريرلر قانماليدير کي، بونو اؤز ديليميزله يازسينلار کي، خالق اوخويوب آنلاسين. "

س.م.غنی‌زاده اوخوجونون رأيي ايله صؤحبته موداخيله ائده‌رک مقاله‌ني اؤز دوشونجه‌لري اساسيندا تاماملايير:

" آخير اؤزونوز اينصاف و موروّت ائدينيز: کاسيبين بيريسي هزار زحمت ايله پارا قازانيب اؤزونون و عاييله‌سي‌نین بوغازيندان ايلده 6 روبل کسير کي، قزئته اوخويوب دونيا حاديثاتيندان معلومات جمع ائتسين. دؤرد صحيفه‌ليک سوفره‌ني آچيب قاباغينا قويور. يئمک چوخ، لاکين هئچ بيريني هضم ائده بيلمير. "

"حيات"-ين اساس ياراديجي سيمالاريندان بيري ده بؤيوک موتفکّير، میلّي تئاتر و مطبوعاتيميزين ياراديجيسي حسن بيگ زردابي ايدي. اونون بو قزئتده چوخسايلي يازيلاري درج اولونموشدو. مدنيت، معاريف، جمعيتين موختليف ساحه‌لرين، طبيعت، طيببه و حئيوانلار عالمي باره‌سينده زردابي خئيلي سايدا پوبليسيستيک مقاله نشر ائتديرميشدي. "حيات"-ين 8 دئکابر 1905-جي ايل تاريخلي نؤمره‌سينده درج اولونان "جمعيتي خئيريه بيناسي" مقاله‌سينده ح.زردابي خئيريه جمعيتيني تأسيس ائتمکله خالقين ريفاهيني يوکسلتمگي، اونون ايقتيصادي-مدني حياتيني ياخشيلاشديرماغي و بو يوللا مکتبلرين سايي‌نین آرتيريلماسي‌نین مومکونلوگونو دوشونوردو. بؤيوک پوبليسيست مقاله‌سينده وضعيتين موقاييسه‌لي تحليليني وئره‌رک يازيردي:

" بيزيم باکي شهرينده هر ايلده مرثيه خانالار اوچون نئچه مين مانات پول ييغيلير و يا فاغير فوقرا آدينا اوندان دا آرتيق خرج اولور. آما اونلاردان میلّته هئچ بير خئيير يوخدور. حتّي ضرري ده وار. چونکي بو سببله ايل‌به‌ايل مرثيه خانالارين و غئيري-ديلنچيلرين قدري ده آرتير. "

مؤليف گؤستريردي کي، مرثيه خانالارا ييغيلان همين وسايته مکتبلر آچيلسا، پئشه-صنعت اوجاقلاري ياراديلسا، خئيريه جمعيتلري دوزلديلسه، خالقا چوخ خئييري ده‌يه بيلر. سؤزوگئدن مقاله‌ده ح.زردابي "زاماني کئچميش، دؤورله اويغونلاشمايان قديم عادتلري دييشديريب، زمانه‌يه مووافيق ايش گؤرمک" طلبيني ايره‌لي سوروردو. "حالوا دئمکله آغيز شيرين اولماز" آتالار ميثاليني چکيب ضياليلاري حرکته کئچمگه، خالقي معاريفلنديرمگه سسله‌ييردي. ح.زردابي مدني ترقّي يولوندا بوتون واسيطه‌لردن سؤز آچاراق میلّي تئاترين خالقا وئره‌جگي ايمکانلاردان بحث ائدن "باکيدا موسلمان تئاتري‌نین بيناسي" مقاله‌سيني "حيات"-ين 13 دئکابر 1905-جي ايل ساييندا درج ائتميشدي. 1873-جو ايلده ح.زردابي باکي رئال گيمنازيياسي‌نین شاگيردلريندن ن.وزيرووون، ع.آدي‌گؤزلووون و ديگر طلبه‌لرين ياخيندان ايشتيراکي ايله آذربايجان میلّي تئاتري‌نین اساسيني قويموش، خالقي مدنيت، معاريفه جلب ائتمگه سعي ائتميشدي. مؤليف اؤز مقاله‌سينده او دؤوردن خئيلي واخت کئچمه‌سينه باخماياراق، خالقين بو مدنيت اوجاغينا اعتيناسيز ياناشماسيني اورک آغريسي ايله قارشيلاياراق يازيردي:

" نئچه ايل بئله تئاتر چيخارديق ايسه ده باکي موسلمانلارينا تئاترا گئتمگي اؤيره‌ده بيلمه‌ديک. چونکي او واختدا اونلار گون باتاندان سونرا ائودن چؤله چيخماغي گوناه ساييرلار."

"اکينچي" قزئتي‌نین يارانماسينا ديقّت چکن ح.زردابي "حيات"-ين 28 دئکابر 1905-جي ايل و 3 يانوار 1906-جي ايل تاريخلي ساييندا، "روسیهده اوّلينجي تورک قزئته‌سي" مقاله‌سيني درج ائتديرميشدي. مطبوع سؤزون ايمکانلاريني خالقين معاريفلنمه‌سينده، ديرچه‌ليشينده اساس فاکتورلاردان بيري حساب ائدن بؤيوک موتفکّير يازيردي:

" بير بولاغين سويونون آلتينا نه قدر بؤيوک داش قويسان، بير نئچه ايلدن سونرا او سو تؤکولمکدن او داش مورور ايله اريیيب دئشيلير، هابئله سؤز ده بئيينلره اثر ائدر، "سونرا دوشمنین دوشمنليگي، دوستون دوستلوغو و دوست گؤسترن يولون دوغرو اولماسي آشکار اولار. "

"حيات"داکي کسکين يازيلاريندا ح.زردابي دؤولت قوللوقچولاري‌نین روشوت آلماسينا، پول گوجونه اونلارين حاقي‌نین تاپدانماسينا، عدالتلي دئييل، عدالتسيزليگي مودافيعه ائتمه‌لرينه اعتيراض ائدير، خالقي بو عئيبجر اوصوللارا قارشي موقاويمته سسله‌ييردي. "کند ميرزه‌لريندن خيلاص اولمالي‌ييق" مقاله‌سينده مؤليف ايالتلرده اؤزباشيناليقدان، قانونسوز عمللردن يازيردي: "بيزيم کند اهلي هئچ آغ گون گؤرمه‌ييب. اونو هميشه سؤيوب-دؤيوبلر، اوندان روشوت آليبلار. بئله پروريش تاپان آدامي هئچ اينانديرماق اولماز کي، دونيادا تميز آدام اولا". روشوت وئرمگه اونلار عادت ائديرلر و روشوت آلاني دا چوخ ياخشي آدام حساب ائديرلر. مقاله‌‌نین چاپيندان بير عصردن چوخ کئچمه‌سينه باخماياراق سانکي بو سيتات موعاصير آذربايجان ژورناليستيکاسي‌نین هانسيسا بير نومونه‌سيندن گؤتورولوب و بو پروبلئم ايندي جمعيتي ان چوخ دوشوندورن مسله‌دير. "حيات" قزئتي‌نین 4 و 11 يانوار 1906-جي ايل تاريخلي سايلاريندا درج اولونان "زيندگانليق دعواسي و ياخود ديريليک موباريزه‌سي" و "ايتّیحادي-ليسان" سرلؤوحه‌لي مقاله‌لرينده معاريفچي دئموکرات جبهه‌سي‌نین کومانداني اولان حسن بيگ حقيقي وطنپرورليگي، اصيل اينسانيتي خالقي غفلت يوخوسوندان اوياتماقدا گؤرور و خالقا اوز توتوب دئييردي: "اوخويون، عئلم تحصيل ائدين". او، " ايتّیحادي-ليسان" مقاله‌سينده عئلمسيز جمعيتي قارانليق اوتاغا بنزه‌ديردي:

" عئلم تحصيل ائتمگه باشلايان طايفا قارانليق اوتاغين قاپيسيني آچيب چؤله چيخان کيميدير کي، بو زامان گونون ايشيغي اونون گؤزلريني نورلانديرماقدان باشقا، اوتاغين دا ايچينه داخيل اولوب، اورادا اولان شئيلري آرتيق ايشيقلانديريب بير غئيري-صورته سالير. "

طيب، طبيعت، صحیّه قايدا-قانونلاردان بحث ائدن پوبليسيستيک يازيلاردا حسن بيگ زردابي اينسانلارا خاريجي عالم باره‌سينده تصوورلر فورمالاشديرماغا، حاديثه و پروسئسلرين سببيني دوغرو آنلاماغا کؤمک ائدن معاريفچي مؤوقئع نوماييش ائتديريردي. گؤرکملي ايجتيماعي-سياسي خاديم، يازيچي-دراماتورق، پوبليسيست نريمان نريمانوو دا "حيات"-ين مطبوع ايمکانلاريندان يارارلانميش، موختليف سپکيلي يازيلاريني درج ائتديرميشدي. ن.نريمانوو دؤورون طلبلرينه اويغون اولاراق فئليئتون ژانريندا قلمه آلديغي 50-دن چوخ يازيني "حيات"-ين صحيفه‌لرينده چاپ ائتديره‌رک اوخوجولارا چاتديرميشدي. ن.نريمانووون "حيات"داکي پوبليسيست يازيلاريندا اساساً 1905-جي ايل اينقيلابي، اونون آذربايجانا تاثيري، خالقين میلّي اويانيشي پروسئسلري اؤز عکسيني تاپميشدير. پوبليسيستيکاسيندا اؤز فيکير و دوشونجه‌لريني داها آسان يوللا خالقا چاتديرماق اوچون ن.نريمانوو موختليف ادبي-بديعي واسيطه‌لردن اوستاليقلا ايستيفاده ائديردي. شيفاهي خالق ادبياتيندان، کلاسيک آذربايجان يازيچيلاري‌نین و غرب موتفکّيرلري‌نین اثرلريندن نومونه‌لر گتيره‌رک فئليئتونلاريني، مقاله‌لريني ماراقلي و اوخوناقلي شکله ساليردي. آنا ديلي مسله‌سينه اؤنم وئرن پوبليسيست بو مؤوضويا "حيات"دا درج ائتديرديگي يازيلاردا دوغما ديلين اينجه‌ليکلرينه توخونور، همچینن آذربايجاني آزاد و فيراوان گؤرمک ايسته‌ييردي. وطن، آنا ديلي، اينسان آنلاييشلارينا سوسيال مضموندان فرقلي بديعي ياناشما طرزي اورتايا قويان نريمانوو "حيات"-ين 30 اييول 1906-جي ايل تاريخلي ساييندا يازيردي:

" وطن اينسا‌نین ائويدير. نئجه کي، ائوينده هر بير شئيه ايختيارين وار، نئجه کي، ائوين بدبختليگي سني غم دونياسينا موبتلا ائدير، خوشبختليگي شاد ائدير، ائله ده اؤزون اوچون وطن بيلديگين مملکتده ايختيارين گرکدير اولا، اونون بدبختليگي گرک اورگيني داغلايا، خوشبختليگي سني شاد-خورّم ائده. "

ن.نريمانوولا ياناشي، "حيات"دا "درويش" ايمضاسي ايله فئليئتونلار چاپ ائتديرن نجف بيگ وزيروو دا چاليشيردي. او، قزئتده "بالاجا موتفرّيقه" باشليغي آلتيندا "درويش" ايمضاسي ايله 50-دن چوخ فئليئتون چاپ ائتديرميشدي. ن.وزيروو چاپ ائتديرديگي ادبي-بديعي اثرلرده جهالتين و ايسلام فاناتيزمي‌نین، مؤوهوماتین تؤرتديگي نتيجه‌لري تنقيد ائديردي. "حيات"-ين 21 اييون 1905-جي ايل تاريخلي ساييندا درج ائتديرديگي فئليئتوندا مؤليف يازيردي:

" عؤمرومده هر نه شيکايتيم وارسا، هاميسي او مني تنگه‌نفس ائدن جهالتدير. خودايا، نه واخت او ظولمتدن خيلاص اولاجاغيق؟ "

قایناق[دَییشدیر]

  • قولي‌يئو عاکيف عبدالعظیم اوغلو. آذربايجان مطبوعات تاريخي (1875-1920). باکي، "عئلم و تحصيل" ، 2009 — 296 ص