قربانعلی رجبلو

ویکی‌پدیا، آچیق بیلیک‌لیک‌دن
پرش به ناوبری پرش به جستجو
قربانعلی رجبلو
آد قربانعلی رجبلو
قیسا بیلگی شاعیر
دوْغوم تاریخ ۱۳۳۵ گونش ایلی
ائمینلی، سولدوز
اؤلوم تاریخ ۱۳۹۴
سولدوز
میللیت ایران تورکلریندن
تحصیل ادبیات

رجبلو تخلصلو قربانعلی ائیوازاوغلو ۱۳۳۵-نجی گونش ایلینده حسنلی تپه‌سینین اته‌یینده یئرلشه‌شن ائمینلی کندینده دونیایا گؤز آچدی. اورتا مکتبینی بیتیریب، ادبیات اوزره لیسانسینی آلیر. نقده و سولدوزون کندلرینده اؤیرتمن وظیفه‌سینده چالیشیر. قربانعلی، رحمتلیک شاعیر علی ایسکندری، داییسیندان، تاثیرله‌نیب شعیر دونیاسینا قدم قویور.

تقاعوده(بازنشستگی) چیخدیقدان سونرا نئچه ایل اورمو شهرینه کؤچور. آمّا دوغما یوردونا اولان سئوگیسی اوزوندن یئنه سولدوز یادینا دوشوب، اونون قوینونا قاییدیر. بو قاییدیشی آشاغیداکی شعیرده گؤرمک اولار:

وطن باغلارینین باری، گۆللری،
اؤردکلی، دورنالی، قازلی گؤللری
محبت چایینین گۆجلو سئللری
وورغونلار، حئیرانلار یادیما دۆشدو...


شعیری‌نین خصوصیتلری[دَییشدیر]

اینجه خیاللی شاعیرین وطنینه، ائلینه، هابئله مدنیتینه درین باغلیلیغینی اوره‌ییندن سوزوب گلن بو شعیرینده دویماق اولار:

قافلانلار مۆلکونون پارلاق اولدوزو
آلوودان شررلی، آذر ائللری
آنالار لایلاسی، آتالار سؤزو
جواهیر ده‌یرلی آذر ائللری...


شاعیر هئچ زامان بویا-باشا چاتدیغی یوردونو اونودابیلم‌هدی. داییم عزیز اؤلکه‌سینین طبیعتی، تاریخی و شان-شؤهرتینی دوشونه‌رک شعیرینده بئله ترنم ائتمیشدیر:

خیالیم آختاریر قارلی داغلاری
حسنلی تپه‌سین، قیزیل جاملاری
عصیرلردن قالمیش اوْ شن چاغلاری
شؤکتلی دؤورانلار یادیما دۆشدو...

اؤلومو[دَییشدیر]

بیزه اوچ اوغول یادیگار قویموش شاعیر ۱۳۹۴-نجو ایل آذرین ۲۹-دا آلتمیش ایل حسرتله دولو بیر یاشامدان سونرا ائلیندن آیریلیب، ابدیته قووشدو. روحو شاد، مزاری نورلا دولسون.

شعرلریندن نومونه‌لر[دَییشدیر]

رجبلو یاشادیغی دؤورانین بوتون آجیلارینی دویوب شعرینده بئله تصویر ائدیر:

کؤنول نه باخیرسان مات-قوت دونیایا،
گۆنش ایشیق دئییل، قارانلیق ساچیر.
هاوا بوغولمادا، دریالار سوسوز،
بۆلبوللر گۆللردن، گۆلزاردان قاچیر.


سۆکوت یئر اۆزونده سالیب بیر هارای،
نه داغلار کیشنه‌ییر، نه شیمشک شاخیر
نه بولودلار گؤیده دالغالانمادا
نه ایرماقلار آخیر، نه یاغمور یاغیر...


هر یانا چؤکوب بیر اؤلومجول سۆکوت
کهلیکلر اوچماییر، قاققیلداشماییر،
بۆلبوللر لال اولوب باتیبدیر سسی،
یاشیل زیروه‌لردن جئیران قاچماییر...


آفریقا، آسیا، اوْرتا دوْغودا
مۆطریبلر الیندن قان چیخیب دیزه،
بهانه ائدرکن اینسان حاقلارین
کۆل سپیر ظالیملر یومولماز گؤزه.


ائله بیر دؤوراندا یاشاییریق کی،
اؤلولر دیری‌یه مئیدان اوْخویور،
آلا قارغا دئییر: طاووس قوشویام،
قوزغونلار بۆلبوله پاپیش توْخویور.


قایناقلار[دَییشدیر]