هوققا(اؤلچو بیریمی)

هوققا — ان قدیم چکی اؤلچو بیریم.

عومومی معلومات

خالقیمیزین معیشتینده ایشله‌دیلمیش، آدینا فولکلوروموزدا و یازیلی ادبیاتلاردا راست گلینن چکی اؤلچو بیریملریندن بیری ده هوققادیر. کوراوغلو قیراتی اؤیدوگو بیر شعرده دئییر:

اوزاق-اوزاق یوللارینان،

بئلی ایپک چوللارینان،

هوققا یاریم ناللارینان،

آت ایگیدین قارداشیدی.

یئنه همین داستاندا گیزیر اوغلو مصطفی بیگ اؤز یولداشلارینا دئییر:

سفریمدی شهری-باغداد،

کیمدی، مننن کؤچن گلسین!

یئددی هوققا هازار پئشه،

مندن آرتیق ایچن گلسین.

گؤروندوگو کیمی، بیرینجی شعرده هوققا‌نین نالین چکیسینی، آغیرلیغینی، ایکینجی شعرده ایسه ایچکی‌نین حجمینی گؤستردیگی‌نین ایضاحینا احتیاج یوخدور. لاکین نالی و ایچکینی عئینی اؤلچو بیریمی ایله اؤلچمک مومکون اولمادیغیندان هوققا سؤزونون آچیقلانماسینا احتیاج دویولور.

حوقّه (حقّه) - عرب دیلینده کیچیک موجرو دئمکدیر. بو سؤز اویون، کلک، حیله معناسیندا داها چوخ ایشله‌نیر.

هوققا سؤزونون عرب دیلینده‌کی معنالاری‌نین هئچ بیری اؤلچو بیلدیرمیر. بو دا اونو گؤستریر کی، هوققا عربلرده هئچ واخت اؤلچو بیریمی کیمی ایشلنمه‌میشدیر. آذربایجان و کرکوک تورکلرینده ایسه هوققا ان قدیم اؤلچو بیریملریندن بیری اولموشدور. بورادان بئله قناعته گلمک اولار کی، بیر چوخ تورک خالقلاریندا ان قدیم اؤلچو بیریمی کیمی ایشلنمیش هوققا عرب دیلیندن آلینمامیشدیر. قدیم سومر دیلینده هوققا سؤزونه راست گلینمه‌سی ده اونون تورک سؤزو اولدوغونو تصدیقله‌ییر.

قایناق

آذربایجان ائتنوقرافیاسی، باکی-2007، "شرق-غرب" نشریاتی. اوچ جیلدده. 3. جیلد. ص. 461. ایسبن 978-9952-34-152-2