ویکی‌پدیا:یاخشی نیت فرضی

ویکی‌پدیا، آچیق بیلیک‌لیک‌دن

یاخشی نیت فرضی، هر جمعی پروژه و ویکیپدیانین کؤکلریندندیر. بیز چوخلو چالیشانلارین یاخشی نیتلی اولدوغونو فرض ائتدیگیمیز اۆچون هامیلارا دییشدیرمه اۆچون ایجازه وئریریک، یوخسا ویکیپدیا پروژه‌سی محدود قالیب، ایندیکی یئرینه چاتمایاجاغیدی.

بۇنا گؤره بیر ایشتیباه دییشدیرمه گؤرورسونوزسه، دییشدیرنین یاخشی نیتلی اولدوغونو فرض ائدیب، قایتارما یوخسا خارابکارلیق آدلاندیرما یئرینه اوْنو دۆزلتمک اۆچون چالیشین. یئنی گلیب، ویکی‌پدیادا چالیشماغی باشارمایانلار قاباغیندا دؤزوملو اۆلوب، دانیشیق صفحه‌لریندن فایدالانین.


آیری سؤزله ائدیلمیش دییشیکلیک اوْلا بیلسین کی٬ سهولر و مقاله‌یه زیان وۇرموشدور٬ آمّا بۇ دییشیکلیک خوْش نیّتله یعنی بیلمه‌دن ائدیلمیش‌سه بۇنو واندالیزم کیمی قبول ائتمک دۆزگون دئییل. اگر کیمینله ایسه فیکرینیز اۆست-اۆسته دۆشورسه٬ یاددان چیخارتمایین کی٬ بلکه ده همین شخص پروژه‌یه کؤمک ائتدیگینه اینانیر. چالیشین کی٬ بۇ زامان دانیشیق صفحه‌لرینده اوْرتاق نؤقطه‌یه گلسیز. بۇ ویکی‌پدیانین دۆزگون٬ قرارسیز بیر ایطلاعات چئوریلمه‌سی اۆچون چوْخ لازیم‌دیر. مخصوصا ده یئنی ایشلدنلر قاباغیندا مخصوص دؤزوملو اوْلماق٬ اوْنلارا دۆزگون یوْل گؤسترمک لازیمدیر. اوْلا بیلسین کی٬ یئنی ایشلدنلر ویکی‌پدیا قایدالارینی بیلمه‌ییرلر و باشلانیشدا بۇ قایدانی پوْزورلار. اوْنلارا دؤزومله گئچینمک لازیمدیر.

یئنی قوْشولان ایشلدنین اؤز حرکتلرینده اؤزونو تامامی ایله حاقلی سایما حالی دا اوْلا بیلر و بۇ مسأله یارادیرسا اوْنون ویکی‌پدیا قایدالارینی بیلمه‌مه‌سیندن قاباغا گلیر. یئنی ایشلدنین بیلمه‌دیگی قایدالاری اؤزونه گؤره نیظاملاماسی چوْخ نوْرمال حالدیر. بعضاً ده بۇ جۆر ایشلدنلر اؤز قایدالارینی آیریلاردان یوخاری تۇتور و قایدالارینی آیریلاری طرفیندن حؤرمتله اۆز-اۆزه اوْلماسینی ایستر. بۇ منشوردان باخدیقدا بیر چوْخ حرکتلر ایشلدنین پیس نیّتلی اوْلدوغونو گؤسترمه‌ییر.

اۇیغونسوزلوق وارسا و سیز اوْنون بیله‌رکدن ائدیلدیگینی دۆشونورسه‌نیز حالدا بئله اوْ شخصی یالان دانیشماقدا گۆناه‌لاندیرمایین٬ بۇنون یئرینه خطانی دۆزلتمک داها دۆزگوندور. چوْخ گۆمان کی٬ اوْ شخص سیزین ائتدیگینیز دییشیکلیگی لازیمجاسینا دۆزگون باشا دۆشه بیله‌جکدیر. مقاله‌نین مضمونونا یئنی آرتیریلان و اوْنون سهو اوْلدوغونو بیلدیگینیز یازیلاری سیلمک عوضینه دۆزلتمه‌نیز داها دۆزگون اوْلاجاقدیر. حتّی چوْخ خوْش مراملی ایشلدنلر بئله خطا ائده بیلرلر و بۇنو دۆزلتمک سیزین بوْیونوزا دۆشور.

خطانی قصداً ائدیب کیمی داورانمایین٬ دۆزلدین٬ آمّا لۆطفاً توهین ائتمه‌یین. ویکی‌پدیادا همفیکیر اوْلمادیغینیز اینسانلارین اوْلماسی نوْرمال بیر حال. آنجاق اوْنلار خطالی اوْلسالار بئله اوْنلارین پروژه‌یه زیان وئرمک ایسته‌دیکلری کیمی باشا دۆشولمه‌مه‌لیدیر. هابئله جمعی فعالیّت ائتمگی باشارمایان اینسانلار دا چوْخ اوْلاجاقدیر و یئنه ده بۇ اوْنلارین پروژه‌یه زیان وئرمک ایسته‌دیکلری کیمی باشا دۆشولمه‌مه‌لیدیر. سیزی «بوْغازا ییغسالار» بئله بۇ اوْنلارین پیس مراملی اوْلدوقلاری‌نین علامتی دئییل. هابئله بیر مقامی دا یاددا ساخلاماق لازیمدیر کی٬ مرامین پیس اوْلدوغو آچیق شیکلده گؤردوگو حالدا بئله گؤرولموش بۆتون ایشلر (قاباقکی نۆسخه‌نین قۇرولماسی و یا ایشلدنین باغلانماسی) شخصین نیّتینی یوْخ اوْنون رفتارلارینی دییشدیریر.

ویکی‌پدیادا دییشدیرمه یوْلوندا دانیشیق یاراندیغی حالدا خوْش نیّتلی اوْلدوغونوزو تئز باشا دۆشه‌جگینیزه اۆمید ائدیریک.

پیس مراملی اوْلدوغونوزون علامتلری اساساً بۇنلاردیر:

  • توهین: هانسیسا بیر ایشلدنه توهین و یا تحقیر ائتمه‌نیز سیزین پیس نیّتلی اوْلمانیز دئمکدیر. بۇ زامان دانیشیق داها چیرکینلشه‌جکدیر.
  • طرفسیزلیک سیاستیندن یایینما. بیلیکلیک اۆچون ان یاخشی‌سی٬ باخیشلاری هئچ بیر طرف‌کئچلیک اوْلمادان٬ عدالتلی بیر فوْرمدا گؤسترمکدیر. طرفلی بیر دییشیکلیگین قایتاریلماسی طرفسیزلیگین قوْرونماسی کیمی باشا دۆشولمه‌لیدیر. بۇ زامان چالیشین کی٬ دیگر ایشلدنین بۇ مقاله‌نی نه‌دن طرفلی حساب ائتدیگینی باشا دۆشَسیز. حاقلی‌دیرسا چالیشین اوْنون فیکیرلرینی ده مقاله‌یه گیردیرین آمّا چالیشین طرفسیزلیگی قوْرویاسینیز. دانیشیق ائدن طرفلر بۇنو ائدرسه اوْ زامان طرفسیزلیک قوْرونموش اوْلار.

اگر سیز ایسته‌ییرسه‌نیز کی٬ سیزین خوْش مراملی اوْلدوغونوزا اینانسینلار اوْنلا بۇنو فعالیّتینیزله گؤسترمه‌لیسینیز. آیریلارینا یۆک اوْلمایین. آیریلارینا «منیم خوْش مراملی اوْلدوغومو دۆشونون» دئمک‌له سیز اوْنلاری خوْش مراملی اوْلدوغونوزا چتین ایناندیراسینیز.