پوْرتال:آذربایجان/سئچیلمیش یازی/۲
اورمیه آذربایجان و ایرانین بؤیوک شهرلریندن دیر. ۱۳۹۰-جی ایلین نۆفوس ساییسی اساسیندا، ۶۸۰٬۲۲۸ نفر اهالیسی واریمیش. بۇ شهر غربی آذربایجان اوستانی و اورمیه بؤلگه‌سینین مرکزی‌دیر. اورمیه شهری آذربایجانین اسکی بیر شهری و مدنیّت مرکزلریندن ساییلیر و نۆفوس باخیمیندان آذربایجانین تبریزدن سوْنرا ایکینجی بؤیوک شهری دیر. بۇ شهر نادر شاهین اؤلوموندن سوْنرا هابئله آزادخان افغان و فتحعلی خان افشار دؤورلرینده آذربایجانین حؤکومت مرکزی اوْلموشدور. کریمخان زند ۱۱۷۷ جی قمری ایلده بۇ شهرین ارکینده جولوس ائدرک اؤزونو وکیل الرعایا آدلاندیردی امامقلی خان بیگلربیگی افشار آدلانمیش آذربایجان سرداری کریمخانین اؤلوموندن سوْنرا آذربایجان منطقه سینی الینه آلاراق بۇ شهرده حؤکومتین باشلادی.آغا محمدخان قاجار ۱۲۱۰ جی قمری ایلده بۇ شهر ده جلوس ائدیب باشینا سلطنت تاجی‌نی قویدو. هابئله بۇ شهر ۱۱۹۷ جی قمری ایلدن باشلایاراق ۱۶ ایل داوام ائدن افشاریان اورمی آدلانان دؤلتینین آذربایجان و قفقاز منطقه سینده مرکزی اولاراق دارالاماره آدلانیردی.