کریستوف کیشلوفسکی
کریستوف کیشلوفسکی (دوغوم 27 ژوئن 1941 ـ ورشو) ـ تانینمیش یؤنتمن.
یاشامی
[دَییشدیر]کریستوف کیشلوفسکی ۱۹۴۱-جی میلادی ایلین ژوئن آیی‌نین ایگیرمی یئددی‌سینده ورشودا دونیایا گؤز آچدی. میلادی ایلین یئتمیشلر اون ایللیگیندن دوخسانلارا قده‌ر تئلئویزیا و سیناما و بلگه‌سل (مستند) فیلم ساحه‌سینده أن آدلیم و تانینمیشلاردان بیریسی اولدوغونو وورغولاماق اولار. چاغداش دؤنه‌مین توپلومسال و اخلاق‌سل دوروملارینی اؤنمسیه رک گؤزه‌ل بیچیم‌ده سیناما و تئلئویزیا آلانلاریندا خاص باخیشلارلا جانلاندیرماق اونو موْدرن سیناماسی‌نین اونلو و بؤیوک یؤنتمن کیمی تثبیت ائتدی. کیشلوفسکی لهئستانین او دؤنه آدلانان “اخلاق قایغیسی اولانلار سیناماسی”-نین أن آدلیم اینسانلاریندان بیریسی ایدی. او فیلم‌لر کی سوسیالیستی سینامانین سانسورلاری‌نین آخسارلیقلارین بیرئی (فرد) و حؤکومت آراسیندا اولان یارانمیش آیریشمالاری اؤنه چیخاردیردی. کیشلوفسکی ۱۹۶۸-جی ایل “لودز” آدلی فیلم دوزلتمک اوخولوندان (مدرسه‌سیندن) معضون اولوب و بئله‌جه فیلم دوزلتمک ایشینه بلگه‌سل و قانونلو اینجه‌صنعت فیلملری (فیلم های مستند هنری و قانونی) یؤنه‌لتمه‌گینی توپلومسال بیلینج‌لرین یوکسلمه‌گی آماجیلا باشلادی. بلگه‌سل فیلم‌لریندن”خسته‌خانا” آدلی فیلمینه توخونماق اولار، بیر حالدا کی یؤنه‌تمن بو ایشیله لهئستانین او دؤنه گئنل بئهداشتیندا اولان سورونلاری آنلاتماق ایسته‌ییر. او ایلک سیناما فیلمینی تئلئویزیا اۆچون یؤنه‌تدی. اونون سیناما اثرلری ده بلگه‌سل گؤرسل‌لردن (تصویر) اولاشیردی. بلگه‌سل فیلم چکمه تئکنیکی ایله قیسا فیلملرینه رئاللیغی آرتیردی. “یارانین یئری (۱۹۷۶)” ” کامئرایا وورغون(۱۹۷۹)” “کور شانس (۱۹۸۱)” کیمی موختلیف قونولاری قاپسیان فیلم لر یؤنه‌تدی.
۱۹۸۴-جی ایلدن کیشلوفسکی بوندان سونرا اوزون موددتلی ایشبیرلیگی‌نی سئناریو یازان یولداشی کریستف پیسویچ ایله، لهئستانلی وکیل آدلی فیلم‌له باشلادی. فیلم لهئستانین ۱۹۸۲-جی ایلین نیظامی حؤکومتین دورمویلا بیرگه بیر اؤلموش وکیلین حئکایه‌سینی اؤز عاییله‌سی‌نین یاشامینی ایزله‌مکده اولدوغونو گؤسترمک‌ده دیر. اون امر فیلملرین کریستوف پیسویچین ایش بیرلیگی ایله اون دنه بیر ساعاتلیق فیلمین توپلوسودور کی موسی پئیغمبرین اون امری‌نین اوزوندن لهئستان تئلئویزیاسینا حاضیرلامیشدیر. فیلملرین بوتونو ورشودا بیر مسکونی مجتمع‌ده کئچیریلیر. بو فیلملرین توپلوسونو وئنیز فیلم فئستیوالیندا ائکران ائدیلیر و مونتقیدلر اونو موْدرن سینامانین اولاغان اوستو اولان بیر اثری آدلاندیریرلار. کیشلوفسکی او چاغ کی لهئستاندان فیلملرینه حاضیرلاماغی اۆچون بودجا آلا بیلمه‌دی فیرانسا دا فیلم یؤنه‌تمه‌گی باشلادی. بو اوزدن ۱۹۹۲ ده ” وورونیکانین ایکی‌لی یاشامی” آدلی فیلمی یؤنه‌لتدیکدن سونرا أورنسل تانینماغا یییه‌لن‌دی.
کیشلوفسکی سونرا آدلیم اوچلوک فیلمینی فیرانسانین بایراغی‌نین بویالاری اساسیندا یؤنه‌تدی. گؤی (،۱۹۹۳ آزادلیق)، آغ (،۱۹۹۴ دنکلیک، برابرلیک) و قیرمیز (،۱۹۹۴ قارداشلیق). گؤی فیلمینده ژولیئت بینوش آفتامابیل(اتومبیل) قضاسیندا ائشی و اوشاغینی ألدن وئرمیش بیر قادینین رولونو اویناییر و یئنی یاشام و اونونلا بیرگه گله‌ن آزادلیق اودوزدوغو سئوگیسی‌نین یئرینی دولدورا بیلمه‌ییر. آغ-دا بیر لهئستانلی آراییشگر چالیشیر ألدن وئرمیش ائشی‌نین سئوگیسی‌نی بیرداها ألده ائده. اونون اؤنجه‌کی قادینی کی جولی دئلفی آدلی آکتور رولونو اویناییر بیر گؤزه‌ل اوزلو فیرانسالی‌دیر کی بیر باشالی ایلیشکی‌لریندن دنکلیک(برابرلیک ) ایسته‌ییر. قیرمیز دا ایسه ایرنه ژاکوب بیر مودئلین اویونون اویناییر کی گئت گئده بیر قوجا یاشلی کیشی‌یه وورولور.
کیشلوفسکی دفعه‌لرجه اؤزونو سیناما دونیاسیندان أمه‌کلی (بازنشسته) اعلان ائتدیگینه رغمن هئچ زامان دوغروجاسینا سینامادان أل اوزه بیلمه‌دیر. اونون سونونجو سیناما پروژه‌سی بیر باشقا اوچلوک ” بئهئشت، جهنم، دوزخ” آدلی ایدی کی بو فیلملرین چه‌کیم‌لری‌نین سونو یئتمه‌میشدن مع‌الاسف کیشلوفسکی‌نین عؤمرونون سونو یئتیر. او کی بیر چوخ زامان دوداغیندا سیغاری واریدی ۵۴ یاشیندا بیر قلب جراحلیق اساسیندا دونیادان گؤز یومدور. “بئهئشت” یاریم قالمیش اوچلوگون ایلک فیلمی ۲۰۰۲-جی میلادی ایلده “تام تاکیرو” یؤنه‌تمن‌لیگی و “کئیت بلاپخت”-ین اویونچولوغو ایله دوزه‌دیلدی.
قایناقلار
[دَییشدیر]- بیلیم سسی Archived 2015-08-11 at the Wayback Machine.