کونفدارسیون

ویکی‌پدیادان، آچیق بیلیک‌لیک‌دن

کونفدراسیون موستقیل قوروم‌لار و تشکیلات‌لار طرفیندن، حاکیمیت‌لرینی موحافیظه ائتمک شرطی  ایله، اورتاق و محدود منفعت‌لرینی تأمین ائتمک مقصدیله موعین موقاویله ایله قورولان بیرلیک‌لردیر. 

  کونفدراسیوندا تشکیلات و قوروم‌لار آنجاق موعین و محدود مقصدلرله بیرلشیرلر. کونفدراسیونو مئیدانا گتیرن کونفدراسیون تشکیلات و قورولوش‌لارین خوصوصیت‌لری، کونفدراسیون حالیندا دا داوام ائدر. اورتاق منفعت‌لرینی رئال‌لاشدیرماغا یارایاجاق نیسبتده بیر امکداشلیق ائدیرلر؛ بونون خاریجینده موستقیل تشکیلات و قورولوش‌لار کیمی صیفت لرینی، حوقوق و وظیفه‌لرینی بوتونلوکله قورویورلار. 

  کونفدراسیونا داخیل کوتفدراسیون تشکیلات و قورولوش‌لار ایستر خاریجی، ایسترسه ده داخیلی باخیمدان تام معناسی‌یلا اؤز حاکیمیت‌لرینه صاحیب‌دیر. عوضو تشکیلات و قورولوش دؤولت ایسه دیگر دؤولت‌لرله هر جور دیپلوماتیک موناسیبت‌لرده اولا بیلیرلر. کونفدراسیون دؤولت‌لر کونفدراسیونا داخیل دؤولت‌لری هئچ بیر تعهود آلتینا سوخمادان باشقا دؤولت‌لرله دؤیوشه گیریشدیکلری کیمی، عئینی کونفدراسیوندا عوضو اولان بیر دؤولت ایله دؤیوش ائتدیگی زامان، بو بین الخالق حوقوق باخیمیندان بیر وطنداش موحاریبه‌سی حساب اولونمور؛ ایکی دؤولتین موحاریبه‌سی ساییلیر. 

  کونفدراسیوندا عوضو دؤولت‌لرین نوماینده‌لریندن مئیدانا گلن بیر مجلیسی واردیر. بو مجلیس طرفیندن آلینان قرارلاری عوضو دؤولت‌لرین ده تطبیق ائده بیلمه‌سی اوچون هر دؤولتین آیری-آیری شخصن صلاحیتلی اورقانین طرفیندن منیمسه‌نه‌رک تصدیق ائدیلمه‌سی لازیم‌دیر. 

  کونفدراسیون دؤولت بیرلیگی بیر آندلاشما ایله مئیدانا گلدیگی اوچون عوضو دؤولت‌لر ایسته‌دیکلری زامان کونفدراسیون دؤولتدن آیریلا بیلرلر. کونفدراسیون تیپی دؤولت بیرلیگینه نومونه اولاراق موستقیل دؤولت‌لر بیرلیگی و اینگیلیس میلت‌لر بیرلیگی وئریله بیلر. تک اکثریتده فدراسیون دؤولت تیپینی حاضیرلادیغی اوچون تاریخی بیر اهمیتی واردیر. حقیقتاً بو گون فدراسیون تیپی دؤولت‌لر، بیر زامان‌لار کونفدراسیون شکلینده ایدیلر. مثلا، سوئیس 1848-جی ایل تاریخه قدر کونفدراسیون حالیندا ایدی. بو تاریخده بو گونکی فدرال دؤولت وضعیتینه گلدی. بو گون بیر فدراسیون دؤولت شکلی مئیدانا گتیرن آبش، 1776-جی ایلدن 1787-جی ایله قدر کونفدراسیون دؤولت شکلی ایدی. بو گونکی بیرلشمیش آلمان‌دا 1870-جی ایله قدر کونفدراسیون دؤولت وضعیتینده ایدی. بو حالدا تاریخی باخیمدان کونفدراسیون، فدرال دؤولت شکلینی حاضیرلایان بیر مرحله‌دیر. باخین. آرژانتین، کوبا، ایسپانیا، کولومبیا، مکزیک، کانادا فدرال دؤولت‌لره نومونه اولاراق وئریله بیلر. لاکین تام ترسی بیر مودت اولاراق بیر ایستیثنا، فدراسیون دؤولتی اولان یوقوسلاوی سون ایکی عوضولری صربیستان و مونتنقرو 2003-جو ایلده صربیستان و مونتنقرو آدیندا بیر کونفدراسیون دؤولتینه چئوریلدی. آما 2006-جی ایلده بو کونفدراسیون ایکی عوضو اؤلکه‌نین سونوندا یول‌لارینی تامامییلا آییریب موستقیل اولونجا سونا چاتدی.