ائلیاد موسوی
ائلیاد موسوی، سلماسلی شاعیر، 1364-جو گونش ایلینده بو شهرده دونیایا گؤز آچیبدیر. [۱]
یاشاییشی و ادبی چالیشمالاری
[دَییشدیر]ائلیاد موسوی، داها گنج ياشلاردان ادبيات و شعره باشلاییب، «شهريار» و «آلما» شعر فستيواللاريندا بيرينجي يئری قازانميشدير. كئچميش ايللرده «سؤزون سؤزو» نئت درگیسی ايله يايين قورولو اولاراق، ايش‌بيرليك ائتميش و «آيالاما» آدلی درگینين باش يازاری اولموشدور. ائلياد موسوي‌نين شعرلري، ايراندان ائشیکده یاییملانان بير چوخ درگیلرده ده چاپ ائدیلمیشدیر، او سيرادان «نيهان ايشيكر» چئوريسی ايله جمهوريت گونده‌ليينين كيتاب اكينده و «جوات چاپان»نين شعر اطلسی و قارداش قلم‌لر درگيسيندن آد چکمک اولار. «گيل گميش» افسانه‌سي، ائلياد موسوی‌نين كؤچورو، ايضاح و يئنی‌دن قوشماسی ايله نخبگان يايين‌ائوی طرفيندن ياييملانميشدير و شعرلريندن علاوه، آراشديرما و تحليلی يازيلاری دا بوگون بير چوخ درگیلرده ياييملانماقدادير.
شعرلریندن نمونه
[دَییشدیر]قوم ساعاتی[۲]
يازمايا بيله‌ردي ده آما يازميشدي
يوخ گله‌جه‌يي اولمايانين كئچميشي
سونرادان اؤنجه‌يه دؤنمك ايسته ميشدي
اوچ ايكي بير دئيه دؤندرميش ساعاتيني
سؤندوروب چكميش سيگاري ان درين نفسي آليب قوطوسونا قويموش
بو باهاليقدا هر كس اؤزونه اؤزل فورمول‌لار تاپمالي
مثلا آيريلديقدان سونرا دؤنوب ايكي تورك قهوه‌سينين پولونو آلميشديم
كافي شاپ صاحابيندان
اوتوروب دانيشميشديق تورك قهوه سيني ايچه‌رك
_بو دؤنه هر نه ياخشي گئدير،
دوروب ال وئرميشديك، دوداقلاريميزدا گيزم‌لي بير گولوش گيزله‌ميشديك
سئويشميشديك دفه‌لرجه بيلميرديك
تانيشميديق سونرا
... گله‌جك سيزلرين _يعني بيزلرين_ زنگين كئچميشي واريميش
اودوزاجاقلاريميز جيب‌لريميزده‌يدي هله قازانيلماميش بير حالدا
آنام پئشمان اولوب قايتارميش سونرالار مني
غزل مثنوی
بیر گون وارییدی باشلا یاریمچیلیق قالان منی-
باشلان یئنه ناغیل کیمی قوی دینجه لیم سنی
بیر گون یوخویدو… – تانری داریخدی یاواش ، یاواش
بیر بوم یاراتدی: دیققتیله چکدی هر نه‌نی
داغ، داش، گونش، بولوت، سو، دنیز، چای، هاوا، زامان
صاندیقچاسین آچیب و چیخارتدی یئلی، چنی
من بوردا تک اوتورموشام آی قیز هایانداسان؟
۱۳۸۶ دا آی قیز هاچانداسان؟
من گؤرموشم سني،سنه تانری اويان زامان
حسرت له قاش گؤزونده قلم اوينايان زامان
تانري گيريش دي هرنه‌دن اؤنجه دوداقلارا
هئي هئي تيكيردي گؤزلريني ياغي داغلارا…
سن قورتاراندا باشلادي سئومك ياراتماغا
سن گؤزلرين يوماندا فيكيرلشدي ياتماغا
سونرا پري لر اؤپدو اوزوندن اوتانمادان
(من گيزليجه غضبلي باخيرديم دايانمادان)
تبريزده گؤزلورم سني ايندي يوبانما چوخ
عرشين بوموندا نازيله جانسيز دايانما چوخ
سنسيز بير عومرودور آخي نيسگيل قيشيندايام
سن سيزلييين نئچه‌نجي اؤلوم جيل قيشيندايام ؟
تانري قلم الينده چكيردي يئيين يئيين
بلكه(؟) ياديندا اولمادي چكسين بير آز شنی
… هئچ كيم يوخويدو … تانري وارییدي بؤيوك و تك
چوخ قورخورام کی قییمایا تانری منه سنی (سنه منی… منه سنی…) [۳]
قایناقلار
[دَییشدیر]- ^ آیالاما درگیسی
- ^ آپارات
- ^ بوخچا سایتی[دائمی اولو باغلانتیلی]