بیمه
سیغورتا (اینگیلیسجه: Insurance) – شخصلرین املاکی، حیاتی، ساغلام‌لیغی، مولکی مسئولیّتی، بیرده قانونوئریجی‌لیک‌له قاداغان اوْلونمایان فعالیّتی، اوْ جمله‌دن تیجارت فعالیّتی ایله علاقه دار اوْلان املاک منافعلری‌نین مۆدافیه‌سی ساحه‌سینده ریسکین اؤتورولمه‌سینه و یا بؤلوشدورولمه‌سینه اساسلانان موناسیبتلر سیستمی‌دیر.
ایختیصاصلاشدیریلمیش تشکیلاتلار – سیغورتا شیرکتلری – طرفیندن سیغورتا ائتدیرنلرین سیغورتا حاقلاریندان (اؤدوللاریندان) فورمالاشان، سیغورتا حادیثه‌سی نتیجه‌سینده سیغورتا ائتدیرنه دین ضررین اؤدنیلدیی سیغورتا فوندونون حسابینا فیزیکی و حۆقوقی شخصلرین املاک ماراقلارینین قورونماسی ایله باغلی اوْلان موناسیبتلر سیستمی‌دیر.
عۆمومی‌لیکده سیغورتا اۆرتیم (تولید) موناسیبتلری‌نین مؤهوم المنتلریندن بیریدیر. بۇ، اۆرتیم (تولید) پروسئسینده مادی ایتکیلرین اؤدنیلمه‌سی ایله علاقه دار و نورمال، فاصیله‌سیز و مۆنتظم تکرار اۆرتیم (تولید)ین اساس شرطلریندن حساب ائدیلیر. سیغورتا خیدمتلری سیغورتا بازارلاریندا یاییلیر. سیغورتا بازاری – پول موناسیبتلری‌نین اؤزل سفراسی‌دیر و بۇرادا آلقی-ساتقی شئیی کیمی خاص خیدمت – سیغورتا مۆدافیه‌سی، تکلیف و اوْنا اوْلان نیازی فورمالاشدیران پول موناسیبتلری کیمی چیخیش ائدیر.
سیغورتا کؤنول‌لو و ایجباری فوْرمالاردا حیاتا کئچیری‌له بیلر. کؤنول‌لو سیغورتا سیغورتاچی ایله سیغورتالی آراسیندا مۆقاویله اساسیندا حیاتا کئچیریلیر. سیغورتانین آپاریلماسینین عۆمومی شرطلرینی و قایدالارینی بللی ائدن کؤنول‌لو سیغورتا قایداسی سیغورتاچی طرفیندن موستقیل بللی اوْلونور. سیغورتانین بتون شرطلری سیغورتا مۆقاویله‌سینین باغلانماسی زامانی بللی اوْلونور. ایجباری سیغورتا قانونون قوه‌سی ایله حیاتا کئچیریلن سیغورتادیر.
قانونوئریجی‌لییه ضد اوْلمایان آشاغی‌داکی املاک منافعلری سیغورتا شئیلری اوْلا بیلر: سیغورتالینین و یا سیغورتا اوْلونان شخ‌سین حیاتی، ساغلام‌لیغی، ایش قابیلیتی و پئن‌سییا تأمیناتی ایله علاقه دار (شخصی سیغورتا)؛ املاکین صاحیب‌لییی، ایستیفاده‌سی و سرنجام‌لیغی ایله علاقه دار (املاک سیغورتاسی)؛ سیغورتالی طرفیندن اوْنا و یا فیزیکی شخ‌سین املاکینا وورولموش زیانین، اله جه ده حۆقوقی شخصه دیمیش زیانین اؤدنیلمه‌سی ایله علاقه دار (مسئولیّت سیغورتاسی).
اؤلکه اراضیسینده یئرلشن حۆقوقی شخصلرین املاک منافعلری‌نین (تکرار سیغورتا و قارشی‌لیق‌لی سیغورتا استثنا اوْلماقلا) و اؤلکه‌نین رزیدنتلری کیمی فیزیکی شخصلرین املاک منافعلری‌نین سیغورتاسی یالنیز سیغورتا فعالیّتی‌نین حیاتا کئچیریلمه‌سینه لیسنزیاسی اوْلان حۆقوقی شخصلر طرفیندن حیاتا کئچیری‌له بیلر.