جعفر کاویان
جعفر کاویان | |
|---|---|
 | |
| Born | 1895 سهلان، قاجار ایمپیراتورلوغو |
| Died | 1975 باکی، آذربایجان شوروی سوسیالیست جومهوریتی |
| روتبه | توم ژنرال |
| کوْماندانی | ساواش وزیری آذربایجان میلی حؤکومتی |
جعفر کاویان (1895، سهلان کندی - 1975، باکی) آذربایجان میلی حؤکومتینین دیفاع وزیری اولموشدور.
خلق قوشونلاری وزیری
[دَییشدیر]
آذربایجان فرقه سی دؤنمی، فرقه فیکیرلرینی پایلاشان آذربایجان گونده لیگینده، خلق قوشونلاری وزیری آقای جعفر کاویانی باشلیقلی، کاویانین یاشامی و فعالیتلری باره ده آشاغیداکی مطلبی چاپ ائتمیشدیر.[۱] قید ائتمک لازیمدیر، بو یازی کیمی کاویانین سوی آدی گاهدان کاویانی شکلینده ده یازیلمیشدیر.
"خلق قوشونلاری وزیریمیز آقای جعفر کاویانی مرحوم محمدعلی [سهلانینن] اوغلودور. آقای کاویانی 1279 ینجی ایل شمسیده تبریز شهرینده آنادان اولموش 16 یاشیندان آزادخواهلیق نهضتلرینده اشتراک ائتمه یه باشلامشدر. آقای جعفر کاویانی آتاسی مرحوم محمدعلی سهلانی سردار ملیایله برلیکده تبریزده واقع اولان مشروطه دؤیوشلرینده دشمانلار علیهینه مبارزه لرده فعال اشتراک ایتمیشدر. مرحوم محمدعلی سهلانین ایکی اوغلو وار ایدی. بری اسرافیل خان ایکینجی سی جعفر کاویان ایدی. اسرافیل خاندا مشروطه انقلابینده اشتراک ایدیب مشابه وورماقدا، آت چاپشماقدا بؤیوک شهرت قازانمشدی.
آقای جعفر کاویانی مرحوم خیابانینن قیامینده گارد ملی دسته لرینن بر گروهانینده فرماندهلیک ایتمیشدیر. او زمان شیخین دورت فرماندهی وار ایدی که اونلارین ان فعاللاریندان بریده آقای کاویان ایدی.
قیام قورتاردیقدان صونرا بر مدت تبریزدن فراری اولور. کاویانی اوچ دؤرت ایلدن سونرا تکرار تبریزه قاییدر و کارگر فرقه سینی تشکیل وئریر کی تکامل روزنامه سیده اونون ارگانی اولور.
لاهوتی واقعه سینده آقای کاویانی ینی دن سیاسی جریانه وارد اولوب آقای دکتر جاوید ایله برلیکده لاهوتینی تبریزه دعوت ایدیرلر. لاهوتی شهره داخیل اولدوقدان صونرا آقای کاویانی و دکتر جاوید اسلحه نی تصاحب ایدیب اسلحه لری دقیق صورتده پارتیزان دسته لرینه داغیدیرلار.
دوقوز گون تمام شهرین امنیتی و پارتیزان دسته لرینه باشچیلیق ایتمک آقای کاویانه تاپشیریلیر. لاهوتینن غفلتا قاچماسی آقای کاویانی و دکتر جاویدی مضطرب اتمه یر. اونلار دقتله باشچیلیق ایتدیگی دسته نی مدافعه ایتمکده گچه شهری ترک ایدیرلر. مهاجرلریمز شهردن چیخدیقدان صونرا مرنده گیدیب آقای برهانینن ایوینده توقف ایدیرلر. مرندده آقای کاویانییه ایراندا قالماق ماموریتی ویریلر. آقای دکتر جاوید و سایره همراهلاری ایسه آراسدان او طرفه کیچرلر. آقای کاویانی اؤز مامورتینه انجام ویردیکدن صونرا جلفایا گیدیرو اورادا ژاندارملار طرفیندن توقیف اولونور. آز مدت صونرا محارتله زنداندان قاچیر.
کاویانی 1305 نجی ایل شمسیده اجتماعیون عامیون فرقه سینه تقویب ایدیب لاکن دولت مامولارینن تعلیمیندن اؤز فعالیتینه ادامه ویره بیلمه یوب شهربانی طرفیندن توقیف اولونور. آقای کاویانی توقیف اولدوقدان صونرا 7 ایل بلاتکلیف تبریز وتهران زندانلاریندا قالیر. نهایت دیوان حرب آقای کاویانینی اؤز عایله سی ایله برلیکده تبریز شهریندن زنجانا تبعید ایدیر. اورادا شهربانی نظارتی آلتیندا ساخلانیلیر.
آقای کاویانی شهریور حادثه سینه قدر زنجاندا تبعید حالیندا یاشاییردی. شهریور حادثه سندن صونرا آقای کاویانی یورغونلوق و قورقو بیلمه دن آقای پیشه وری ایله برلیکده سیاسی فعالیته باشلایوب ان آغیر گونلرده قوخورلو حادثه لردن جان قاچیرمیردی. خلقیمیز آقای کاویانینن بؤیوک خدمتلرین نظرده آلاراق مجلس ملیمیزه نماینده انتخاب ایتمکله اونو ملی حکومتیمیزین خلق قوشونلاری وزیری تعیین ایتمیشدر.
آقای کاویانینن امالینی وطن و خلقینه اولان صداقتینه امین اولماقلا بز آذربایجان روزنامه سینین هیئت تحریه سی طرفیندن آقای کاویانا جان ساغلیغی و بؤیوک موفقیتلر آرزو ایدیریک. محسن "
حاققیندا یازیلار
[دَییشدیر]
ژنرال جعفر کاویان حاققیندا، میرهدایت سیدمرندی چوخلو آراشدیرمالار آپاریب. سیدمرندی وبلاگیندا کاویانین یاشاییشی باره ده ییغجام بیر مطلب یایینلاییب. کاویانین ایکی خانیمی، اوچ اوغلو و اوچ قیزی اولموشدور. [۲]
كاويانا گؤره خدا آفرین درگیسینده اونون هم کندلیسی طرفیندن، کاویاندان نئچه خاطیره آدلی بیر یازی یایینلانیب. [۳]
قایناقلار
[دَییشدیر]- ^ خلق قوشونلاری وزیری آقای جعفر کاویانی، فرقه دموکرات آذربایحان، آذربایجان، 20 دسامیر سال 1945، شماره 82 دوره دوم.
- ^ سیدمرندی، میرهدایت. ژنرال جعفر کاویان (۱)..
- ^ ابوالحسنی سهلان، قدرت. چند خاطره مردم از جعفر كاويان وزير جنگ فرقه دموكرات آذربايجان.، خداآفرین، پاییز سال 1401، شماره 211.