سانتیاقو رامونی کاخال
 | بۇ یازی بیر یتیم مقالهدیر؛ یعنی هئچ صفحهنین بۇ مقالهیه باغلانتیسی یوْخدور.
|
| سانتیاقو رامونی کاخال | |
|---|---|
| آد | سانتیاقو رامونی -کاخال |
| قیسا بیلگی | نوبل طیب و فیزیولوژی اؤدواونو قازانمیش ، 1906 |
| دوْغوم تاریخ | 1852 ایسپانیا |
| اؤلوم تاریخ | 1934 ایسپانیا ، مادرید |
سانتیاقو رامونی -کاخال - گؤرکه‌م‌لی ایسپانیا عالیمی، طیب بیلیمینین نورولوژی، پاتولوژی کیمی موهوم ساحه‌لرینین و هیستولوژینین درین بیلیجی‌سی، سانتیاقو رامونی کاهال دیرلی علمی آراشدیرمالار مؤلفی کیمی تانینیر. بئیینین میکروسکوپیک قورولوشو ایله باغلی اورژینال آراشدیرمالار آپاران عالیمین تصویری صنعت ساحه‌سین‌ده ده خصوصی ایستعدادی اولموش‌دور. اونون بئیین هوجئیره‌لرینی تصویر ائدن یوزلرله رسم اثری بو گون ده طیب اینستیتوتلارین‌دا تدریس اولونور. مشهور عالیم طیب بیلیمینه «مۆعاصیر نورولوژینین آتاسی» کیمی داخیل اولموش‌دور.
حیاتی
[دَییشدیر]۱۸۵۲-جی ایلده ایسپانیانین پتیللا ده آراقون شهرین‌ده دۆنیایا گلمیش کاهالین آتاسی ساراقوس اونیورسیتتین‌ده تطبیقی آناتومی اوزره پروْفسور ایدی. اورتا مکتب ایللرین‌ده عصیانکار و دجل اولدوغو اۆچون دفعه‌لرله مکتب‌دن اوزاقلاشدیریلمیش‌دیر. اون بیر یاشین‌دا شهر داروازاسینی داغیتدیغینا گؤره حبس اولونماسی اونون خاسیتی باره‌ده معین بیلگی وئریر. اوشاق‌لیق ایللرین‌ده پینه‌چی‌لیک و بربرلیک ائدن بالاجا سانتیاقو علمه، خصوصاً ده طیب بیلیمینه بؤیوک ماراغی ایله دقتی جلب ائتمیش‌دیر. آتاسی ایله آناتومیک آتلاس حاضیرلاسا دا، نشر ائدیلممیش‌دیر. ایللر اؤتدوک‌دن سونرا بو ماراغی اونو ساراقوسا بیلیم یودو دا طیب فاکولته‌سینه گتیرمیش‌دیر. او، ۱۸۷۳-جو ایلده طیب تحصیلی اوزره لیسئنزییا آلدیق‌دان سونرا ایسپانیا اوردوسون‌دا حربی حکیم کیمی خیدمته باشلامیش‌دیر. ۱۸۷۴/۷۵-جی ایللرده کوبایا حربی ائکسپئ‌دی‌سییادا ایشتیراک ائتمیش‌دیر. ایسپانیایا قاییتدیق‌دان سونرا مادریدده دوکتورلوق علمی درجه‌سی آلمیش‌دیر. ۱۸۸۱-جی ایلده تصویری و عمومی آناتومی اوزره والنسیا بیلیم یودو دا، ۱۸۸۷-جی ایلده ایسه هیستولوژی و پاتولوژی آناتومی اوزره بارسلونا بیلیم یودو دا پروْفسورو سئچیله‌ن عالیم علمی-پداقوژی فعالیتی ایله یاناشی، بیر سیرا مدنی و علمی-آراشدیرما قوروملارین‌دا دا چالیشمیش‌دیر. او، آیری-آیری واختلاردا ساراقوسا موزئیینین رهبری، میلّی گیگیئنا اینستیتوتونون مسئولو وظیفه‌لرین‌ده چالیشمیش و سونرالار اونون شرفینه کاهال اینستیتوتو آدلان‌دیریلان بیولوژی آراشدیرمالار لابوراتوریاسینین اساسینی قویموش‌دور. عالیمین طیب بیلیمین‌ده‌کی فعالیتی چوخشاخه‌لی‌لیگی، مهسولدارلیغی و اورژینال‌لیغی ایله سئچیلمیش‌دیر. اونون ایلک آراش‌دیرمالارینی ایلتیهابین پاتولوژیسی، خولئرانین میکروبیولوژیسی، اپیتل هوجئیره‌لرین و توخومالارین قورولوشونا حصر اولونموش‌دور. اونون «هیستولوژی و میکروقرافییا اوزره تلیمات»، «هیستولوژینین اساسلاری»، «عمومی پاتولوژی آناتومی اوزره تلیمات»، «هیستولوژی آناتومی و سینیر مرکزلری باره‌ده یئنی آنلاییشلار»، «اینسانلار و اونورغالیلارین سینیر سیستمی باره‌ده مقاله‌لر توپ‌لوسو» و «اونورغالیلاردا گؤزون تورلو قیشاسی» اثرلری طیب ساحه‌سین‌ده چوخ مشهوردور. روسیه، فرانسه ، آلمان کیمی اؤلکه‌لرین اؤدوللارینا لایق گؤرولموش کاخالین آراش‌دیرمالاری ایسپانیا و فرانسه نین علمی مجموه‌لرین‌ده درج اولونموش‌دور. دۆنیانین بیر چوخ نفوذلو علمی مرکزلرینین، او جمله‌دن مادریدده‌کی کرال علملر آکادمیسینین، کرال طیب آکادمیسینین، ایسپانیا طبیعی تاریخ جمعیتی و لیسسابون علملر آکادمیسینین عضوو، بؤیوک بریتانیانین کئمبریج، آلمانین وورسبورق اونیوئرسیتئتلرینین فخری دوکتورو سئچیلمیش‌دیر. آنجاق اونون تلتیفلرینین زیروه‌سی ۱۹۰۶-جی ایلده کامیلو قولقی ایله بیرلیک‌ده «سینیر سیستمینین قورولوشو ایله باغلی آراشدیرمالارینا گؤره» فیزیولوژی و طیب اوزره نوبل اؤدولینا لایق گؤرولمه‌سی‌دیر. سانتیاقو رامونی کاهال ۱۹۳۴-جو ایلده مادریدده دۆنیاسینی دییشمیش‌دیر.