شیرکو بیکس
| شیرکو بیکس | |
|---|---|
 | |
| دؤغوم‌تاریخی | شیرکو فایق عبداله ۲ مهٔ ۱۹۴۰ سولیمانیه، عراق کوردوستانی |
| اؤلوم‌تاریخی | ۴ آقوست ۲۰۱۳ (۷۳ یاش) ایستوکهولم، سوئد |
| ایش | شاعیر |
| میللیت | کورد |
| آروادی | نسرین میرزا (ائولی ۱۹۶۹)[۱] |
شیرکو بیکس ـ مۆعاصیر کورد موْدرن شعر یارادیجیلاری‌نین تانینمیش سیمالاریندان.
حیاتی
[دَییشدیر]شیرکو بیکس ۱۹۴۰دا سولئیمانیه شهرینده مدنی بیر عائله ده دونیایا گؤز آچدی. آتاسی تانینمیش شاعیر فائق بیکس و آناسی ایسه آیدین و مدنی بیر قادین ایدی. شیرکو ۸ یاشیندا آتاسینی ایتیردی و ۱۳ یاشلاریندان عائله‌سینی ترک ائتدی و ادبی فعالیتلرله برابر ایجتیماعی و سیاسی چالیشمالارا قوشولدو. ۴۷ یاشیندا سورگون اولاراق، سوئدده یاشاماغا مجبور اوْلدو.
۱۷ یاشینا ایکن ایلک شعر کیتابینی نشر ائتدی. شیرکو بیرچوخ حئکایه، رومان، درام اثرلری و شعر کیتابلاری نشر اولونموشدور. او عئینی حالدا گؤزه‌ل ترجومه‌چی‌ایدی. دونیانین بیر چوخ شاعیر و یازیچیسیندان او جومله‌دن: لورکا و هیمینگوی‌دن ترجومه‌لر یایمیشدیر.
شیرکو بیکس ادبی –ایجتیماعی فعالیتلرینه گؤره سوئد یازیچیلارینین «توخولوسکی» آدینا دونیا مقیاسلی جایزه‌سینی قازانمیشدیر. قئید ائتمه‌لی‌ییک کی بۇ جایزه هر ایل سورگونده یاشایان شاعیر، یازیچی و عالیم انسانلارا وئریلیر. شیرکو عئینی حالدا ایتالیانین انسان حقوقلارینی قورویان کومیته طرفیندن فلورانس شهری‌نین فخری وطنداشی آدینا لاییق گؤرونموشدور.
بیکس ۱۹۹۱ ده اؤلکه‌سینه قاییتدی و مدنی – سیاسی ساحه‌لرده فعالجاسینا اشتراک ائتدی و سونرالار «سه ردم» آدلی بیر یایین ائوی آچدی؛ اوردا بیر چوخ کیتابلار یایدی.
شیرکو بیکس ۷۳ یاشیندا خرچنگ خسته‌لییدن استکهلم خسته‌خاناسیندا مرداد آیی‌نین ۱۳ده دونیامیزدان کؤچدو.
بیکس‌ین وصیت‌نامه‌سی
[دَییشدیر]“دوغروسون ایسته‌سه‌نیز؛ من بۇ شهرین، تپه‌لری یاخود مشهور مزارلیق‌لاری‌نین هئچ بیرینده تورپاغا تاپشیریلماق ایسته‌میرم. بیرینجی اونا گؤره کی بوردا بوش یئر قالمامیشدیر؛ ایکینجیسی ایسه من هئچ واخت شولوق یئرلری سئومه‌میشم. شهریمیزین شهرداری اجازه وئرسه اگر، منی سلیمانیه‌نین ۱۹۶۳ – نجی ایلینین شهیدلری‌نین هئیکل‌لری یانیندا باسدیرین (اورانین فضاسی منیم اۆچون لذت وئریجی‌دیر؛ من اورادا داریخمارام!)
من سئویرم اؤلندن سوْنرا، شهریمین انسانلاری‌نین موسیقی صدالاری، رقص‌لری و بۇ پارکین گؤزه‌للیک‌لری ایله باش – باشا قالام، قوشالاشام.
ایسته‌ایرم کیتابخانامی، شعیر کیتابلاریمی، شکیل‌لریمی بیر کافه تریادا، بالاجا بیر باغچادا، مزاریمین یانینداجا تشکیل ائتسینلر. شاعیرلره، یازیچی‌لارا، سئویب، سئویلن اوغلان- قیزلارا پاتوق اولسون. اونلار منیم قوناقلاریم اولسونلار! من ایندیدن، بۇ صحنه‌لری بیر رؤیا اولاراق گؤرمه‌ای سئویرم.
ایسته‌ایرم سازین اوره‌ک اوخشایان صدالاری آلتیندا، علیمردانین ماهنی‌لاری و موغام‌لاری «الهی وطنیمی آباد ائله» هیمنی ایله کوردوستانین بایراغینا بوکولو تورپاغا تاپشیریلام.
ایسته‌ایرم منیم تورپاغا تاپیشریلما مراسیمیم ده، یاسیمدا موسیقی چالینسین. شهریمین صنعتکارلاری‌نین تابلولاری تورپاغیم اوزه‌رینده قویولسون.
من ایسته‌ایرم من اؤلندن سوْنرا «بیکس» آدینا ایللیک بیر ادبی جایزه یارادیلسین و اونو ان گؤزه‌ل شعر کیتاب‌لارینا وئرسینلر. آدی چکیلن جایزه نین بوتون خرجی منیم ارثیمدن اؤده‌نیلسین“!
شعرلریندن اؤرنک
[دَییشدیر]اؤیود
چوخ شئیلر وار کی:
پاسلانار، چورویر
اؤلر
اونودولار
تاجلار
داش‌قاشلی عصالار
شاهلارین تاختلاری کیمی!
چوخ شئیلرده وار کی:
پاسلانماز،
چورومز
اؤلمز
اونودولماز
چارلی چاپلی‌نین
بؤرکو
عصاصی و
باشماقلاری کیمی!
قایناقلار
[دَییشدیر]- ^ شێرکۆ بێکەس، شاعیری سەدەیەک. س.ح. (25 February 2020). آرشیولنیب اصلی نۆسخه‌دن on 2021-08-23. یوْخلانیلیب2021-04-04.