قاجار موزه‌سی
 |
قاجار موزه‌سی یا دا امیر نظام ائوی — شئشگیلان محله‌سینده قاجار دؤنمیندن قالان گروسلو امیر نظام ائوینده اولان موزه. بو ائو بیر زمانلار آذربایجان نین اوستان باشخانی‌نین رسمی ائوی اولوب. توجه ائتمه‌مک ندنی‌ایله بو تیکینتی چوخلو داغیلیشلار گؤرموشدور، بو عیلته گؤره بعضیلر بو تیکینتی‌نی داغیتماق و اونون یئرینده اوخول (مدرسه) دوزتماق ایسته‌ایردیلر. نهایت‌ده بو تیکینتی ۱۳۸۵ (هیجری گونشلی) ایلینده مرمت اولدو.
موزه حاققیندا
[دَییشدیر]تبریز، ایرانین مختلف تاریخی دؤنملرینده خاص ارزیش و اهمیته مالیکدی کی ائلخانلار و قاجارلار دؤوورلرینده بو عظمت لاپ یوخرییا چاتمیشدی. ه. ق ۱۲۱۸-ده عباس میرزا فتحعلیشاهین ناییبالسلطنهسی اولدوغوندان بری بو شهر رسماً ولیعهدنشین اولوب ایران-روس ساواشلاریندا دا تبریز فرماندهلیک قرارگاهی ایدی. بو شهرده، قاجارلار دؤوروندن، چوخلو بینا یادگار قالیبدیر کی امیر نظام ائوی اونلاردان بیریسیدیر. بو ائو، تبریزین قدیم محلهلریندن بیری اولان شئشگیلاندادیر.
قاجارلار زامانیندا بو محلهده بیر چوخ گؤزل عمارتلر تیکیلمیشدی کی امیر نظام گروسینین ائوی اونلارین دهیرلی قالینتیلارینداندیر کی هله‌ده صلابتلی و عظمتلیدیر. گونوموزده قاجار موزه‌سی اولان بو عمارت، ناصرالرین شاه دؤورونده، امیر نظام گروسینین پیشکارلیغی زامانیندا و اونون طرفیندن دوزلدیلیبدیر. ناصرالدین شاهین خاطیره‌لرینده، فرنگه اوچونجو سفرده بو ائو وصف اولونوب.
منبعلره گوره سونرالار دا آذربایجان والیلری بو ائوده ساکین اولورموشلار. قالان قیسمت، بو ائوین بیر قیسمتیدیر تاسوفله دیگر قیسمتلری آرادان گئدیبدیر.
پهلوی دؤورونده بو ائو دارایی ایدارهسی و فرهنگ ایدارهسی اولاراق ایستیفاده اولونوبدور. ۱۳۷۰-ده فرهنگی میراثلار سازمانی طرفیندن ساتین آلینیبدیر. بینایا وارد اولان جدّی خیسارتلره گؤره اونون معمارلیق خصوصیتلری و سونّتی موشخّصهلرینه باخیلاراق تعمیر اولونوب ه. ش ۱۳۸۵ اوردیبهشتده، تیکینتی ایشلرینین قورتولدوغوندان سونرا، قاجار موزه‌سی اولاراق اشلهدیلیب.
معمارلیق خوصوصیتلری
[دَییشدیر]امیر نظام عمارتی ۱۵۰۰ مترمربع زیربینا و ایکی طبقه‌ده تیکیلیب. اندرونی و بیرونی اولاراق ایکی حَیَطی وار کی باغچالار و حوضلار گؤزللیگینی یوز قات ائدیر.
۱۶ ستون، گؤزل سرستونلرله، باشاباش ائویانی (ائیوان) ساخاییرلار. اوست طبقه‌ده رنگلی شوشهلی مشبک اروسی پنجرهلر، شومالی و جنوبی نمانین گچبریلری و ایچری تالارلارین و طنبیلرین آیناکارلیق وگچبریسی مجموعه‌نین گؤزللییینی آرتار. زئرزمیده گنیش بیر حوضخانا وار کی بینانین لاپ گؤزل یئرلریندندیر؛ حوضخانانین محکم ستونلاری و سقفینین کرپیج دوزومو گوزه گلندیر.
موزهنین تالارلاری
[دَییشدیر]بیرینجی طبقه تالارلاری: سکّه، توخونما (بافته)، چینی، شوشه (آبگینه)، موسیقی، خاتم، فلزلر تالاری.
ایکینجی طبقه تالارلاری: داش، اسلحه، رجال و فرامین، معمارلیق و شهرسالما (معماری و سهرسازی) تالاری.