مژگان صیامی
| مژگان صیامی | |
|---|---|
 | |
| آد | مژگان صیامی |
| اؤلوم تاریخ | ۱۴۰۳ فروردین ۱۸ اردبیل |
| اؤلوم سببی | اینتیحار |
| مزارلیغی | قاسمیه |
| اتنیک | تورک |
| وطن‌داشلیق | ایران |
مژگان خانیم صیامی (فا: مژگان صیامی) تانینمیش آذربایجانلی یازیچی، شاعیر، مترجم و ژورنالیست. سارای درگیسینین قوروجوسو.
حیاتی
[دَییشدیر]گؤرکملی آذربایجان ژورنالیستی، شاعری، مترجمی و «سارای» درگیسینین صاحیبی و باش یازاری، اردبیل ادبی محیطی‌نین تانینمیش مدنی سیماسی و ائتنیک حاقلاری اکتیویستی مژگان خانیم صیامی، اردبیل شهرینده دونیایا گؤز آچدی. آتاسی ارتش حکیمی ایدی؛ ایلک تحصیلاتی و اورتا مکتبینی «جهان تربیت» مکتبینده بیتیریب، اؤزو دئمیشکن «ائله او زاماندان اؤزونده بیر سیرا عجیب و بلکه غیر عادی دویغولار - دوشونجه‌لرله یاشاییردی» عادی حیات ایله سویو بیر آرخا گئتمه‌ییردی. انسانی علم‌لر رشته‌سینه علاقه‌سی اولاراق، دیپلم آلان چاغی، ائله همن ایل کنکوردا ایکی تحصیلی رشته‌دن قبول اولور (ادبیات و روانشناسی). اردبیل بیلیم‌یوردوندا عالی تحصیلاتینی باشلاییب، ادبیات اوخویوب لیسانس آلیر. یوکسک لیسانسینی پیام نور بیلیم یوردوندا اوخوماق ایسترکن، حیات یولداشی اونون اجتماعی - مدنی ایشلرینه مانع یاراتدیغی اوچون آیریلماق مجبوریتینده قالیر. خانیم صیامی ائله او ایللرده مختلف دبیرستانلاردا ادبیات - تاریخ ادبیات - دستور و نگارش اؤیرتمنی اولوب. مژگان خانیمین ده‌یرلی یازیلاری (داستان - شعر - طنز - مقاله و...) او زامانین اؤنملی نشریه‌لرینده چاپ اولوردو او جمله‌دن: (آزما - آدینه - گل آقا - شهروند - ایران دخت و...)
خانیم صیامی اون‌سکگیز ایل اؤنجه (سارای) درگیسینین امتیازینی آلیر. گئجه - گوندوز دایانماندان دورمادان شرفلی، ائل سئور، وطن سئور، آزاد، باش اوجا، یاشایان بیر ژورنالیست کیمی چالیشماغا باشلاییر.
«مژگان خانیم صیامی» مین دؤرد یوز اوچونجو ایلین فروردین آیی‌نین ۱۸نجی گونو گؤزلنیلمه‌دن یاشادیغی اردبیل شهرینده حیاتلا ابدیلیک وداعلاشدی.
ادبی و توپلومسال شخصیتی
[دَییشدیر]مژگان خانیم صیامی آذربایجان ادبیاتیندا دؤیوشکن شاعر، تعهدلی ژورنالیست و انسان آزادلیغینی، ملی کیملیگی و گئندر برابرلیگی پرنسیپلرینی مودافعه ائدن قلم صاحیبلریندن ایدی. هله اللی یاشی تماملانمامیش تاسفلی اؤلومو ایله ادبی اجتماعی جمعیتیمیزی آغیر بیر شوکا سالان اونودولماز قلمداشیمیزین یارادیجیلیق عؤمرونون چوخ دا اوزون اولماماسینا رغما، اونون ژورنالیسم و ادبیات ارثی چوخ زنگین و ده‌یرلی‌دیر. نشرینین اجباری دایانیلماسینا کیمی آردیجیل اولاراق ایکی دیلده ۴۵ نومره‌سی ایشیق اوزو گؤره‌ن «سارای» آیلیق درگیسی آذربایجان ژورنالیسم تاریخینده اؤزونه مخصوص یئر قازانان ژورنالیسم نمونه‌لری سیراسیندادیر.
بازداشت و زندان
[دَییشدیر]خانیم صیامی، ایکی دؤنه چالیشمالارینا گؤره توتوقلانیب زیندان ائدیلمیشدیر.[۱]
اثرلریندن
[دَییشدیر]- «چشم‌ها متهم ردیف اول‌اند» (۱۳۹۸)
- «سون سکانس» آدلی اون‌بئش تورکجه حئکایه توپلوسو (۱۳۹۵)
- «اردبیل‌نامه» بئش جیلدلیک (۱۳۹۵)
- ساوالانین گؤز یاشی (ابراهیم دارابی‌نین «اشک سبلان» آدلی تاریخی رومانی‌نین تورکجه ترجمه‌سی، ۱۳۹۵)
- «یاشیل مئشه‌نین اولولری» آذربایجانلی یازیچی محمدرضا بایرامی جنابلاری‌نین مردگان باغ سبز آدلی فارسجا رمانی‌نین تورکجه‌یه چئویریسی (۱۳۹۷)
- مجموعه شعرهای فارسی
- مقاله‌لر توپلوسو
- سارای درگیسی (۴۵ سایی)
- دؤورو مطبوعات و اینترنت صحیفه‌لرینده چاپ اولموش شعرلری
- هاشیم ترلانین«اوشاقلار» عنوانلی شعر مجموعه‌سی‌نین رئداکته و نشر حاضیرلاماسی (۱۳۸۷)،
- «قربانیان بند نسوان» اؤزو زینداندا اولارکن شاهید اولدوغو قادین محبوسلارین احوالاتینی عکس ائتدیرن کیتاب
- «مردان روسپینام»
- «یاشامادیم قوسدوم» شعر مجموعه‌سی،
- فارسجا شعرلری،
- پوبلیسیستیک مقاله‌لری
- بیر چوخ دیگر اثرلری.[۲]
قایناق
[دَییشدیر]- بولاق درنه‌یی، بولاق وئبلاقی.
- ^ نمادهای آزادی، مژگان صیامی
- ^ ایشیق – آذربایجان ادبیات و اینجه صنعت سایتی