کانویون یاشام اویونو
یاشام اویونو ۱۹۷۰-جی ایلده اینگیلیس ریاضیاتچی جان هورتون کانوی طرفیندن حاضیرلانمیش هوجره‌سل (سلولی) اتوماتای‌دیر. یاشام اویونو صفر اویونچولو بیر اویوندور. باشقا سؤزله، بو اویون؛ ایلکین بیلگیلردن باشقا اویونا ائتکی (تاثیر) بوراخماماق اوچون، هئچ بیر اویونچونون اوینامادیغی بیر اینسانسیز اویوندور.
قایدالار[دَییشدیر]
یاشام اویونونون ائورنی (دونیاسی)، ایکی اؤلچولو سونسوز جدول و عمودی بردارلاردان و مربعی سلول‌لاردان عبارتدیر. سلول‌لار ایکی وضعیتده اولا بیلر: اؤلو و یا دیری. هر بیر سلول یاتای (افقی)، دیکئی (عمودی) و یا مورب اولاراق یاپیشیق اولان سققیز قونشوسو ایله بیرباشا قارشیلیقلی ارتباط قورور. هر هانسی بیر سلول اوچون هر آددیمدا آشاغیداکی دئییشیکلیکلردن بیری باش وئریر:
- جانلی سلولون ایکیدن آز جانلی قونشوسو وارسا، او، "یالنیزلیقدان" اؤلور.
- جانلی سلولون اوچدن چوخ جانلی قونشوسو وارسا، او، "قالابالیقلاشما (شلوغی) ندنیله" اؤلور.
- جانلی سلولون ایکی و یا اوچ جانلی قونشوسو وارسا، او، دییشمدن سونراکی نسله اؤتورولور.
- اؤلو سلولون تام اوچ جانلی قونشوسو وارسا، او، یئنی جانلی سلول عمله گتیریر.
باشلانیشداکی پایلاما، سیستئمین توخومو آدلانیر. بیرینجی نسل یوخاریداکی قایدالاری "توخوم"ون هر بیر سلولونا عینی واختدا تطبیق ائتمکله اَلده ائدیلیر - جانلانمالار و اؤلوملر بیر آندا باش وئریر. گلجک نسله گئدن بو آددیم بعضا "تیک" آدلانیر. (باشقا سؤزله، هر نسل سادجه اولاراق اؤنجه‌کی نسلده پایلانمانین نتیجه‌سیدیر). داها چوخ نسل یاراتماق اوچون بو قایدالار عینی شکیلده دال با دال تطبیق ائدیلیر.