تورکیه جومهوریتی‌نين جوغرافی بؤلگه‌لری

ویکی‌پدیادان، آچیق بیلیک‌لیک‌دن
تورکیه جومهوریتی‌نين جوغرافی بؤلگه‌لری

تۆرکیه‌نین جوْغرافی بؤلگه‌لری، ۶ ژوئن - ۲۱ ژوئن ۱۹۴۱ تاریخلری آراسیندا آنکارادا توْپلانان بیرینجی جوْغرافیا کوْنگره‌سی طرفیندن معیّن اوْلونموشدور. کوْنگره ایلک، اوْرتا و لیسانس تدریس پلان پروْقراملاری ایله درس کیتابلاری، جوْغرافیا ترمینلری و جوْغرافی آدلارین یازیلماسی، تۆرکیه جوْغرافیاسی‌نین آنا خطلری و یئرلرین آدلاندیریلماسی اۆزرینده ایش آپارماق مقصدیله توْپلاشمیشدی. بۇ ایشین نتیجه‌سینده تۆرکیه‌نین اۆچ طرفی دنیزلرله چئوریلمیش اوْلماسی، داغلارین آنادوْلونون ایچ طبقه‌لرینی ساحیللردن آییرماسی، ایقلیم، نقلیات و بیتکی اؤرتویو کیمی معیارلار نظره آلیناراق تۆرکیه‌نین جوْغرافی بؤلگه‌لری معیّن‌له‌شیبدیر.

بیرینجی جوْغرافیا قۇرولتاییندا تۆرکیه‌نین جوْغرافیسی ۷ بؤلگه‌یه و ۲۱ بؤلمه‌یه آیریلمیشدیر.

جوْغرافى بؤلگه‌لرین آییران عامیللر[دَییشدیر]

جوْغرافى بؤلگه‌لر و جوْغرافى بؤلگه‌لرین حودودلارى تثپیت اوْلوركن بۇ عامیللر دیقّته آلینمیشدیر.

  • طبیعت شرطلری
  1. موْقعیت
  2. اراضى شكیللری
  3. ایقلیم
  4. بیتكى اؤرتوسو
  • بشرى شرطلر
  1. اهالی
  2. مسکونلاشما
  • ایقتیصادى شرطلر
  1. كند تصرّوفاتی
  2. حئیواندارلیق
  3. تیجارت
  4. تۇریزم

بؤلگه‌لرین آدلاندیریلماسی[دَییشدیر]

تۆركیه‌نین یئددى جوْغرافى بؤلگه‌سیندن دؤردونه قوْنشو اوْلدوغو دنیزین آدى وئریلمیشدیر (آغ‌دنیز بؤلگه‌سی، قارادنیز بؤلگه‌سی، اژه بؤلگه‌سی، مرمره بؤلگه‌سی). قالان اۆچ بؤلگه‌ده بۇتونو آنادولو ایچینده‌كى یئرلرینه گؤره آدلاندیریلمیشدیلار (ایچ آنادولو بؤلگه‌سی، دوْغو آنادولو بؤلگه‌سی، گونئی دوْغو آنادولو بؤلگه‌سی). تۆركیه‌نین جهت آدلاندیرمالاریندا دوْغو شرق، باتى غرب، گۆنئی جنوب، قوزئی شیمال اولاراق آدلاندیریلیر.

بؤلگه‌لرین اهالیسی[دَییشدیر]

تۆركیه ده كى جوْغرافى بؤلگه‌لر آراسیندا اهالى میقدارى و سیخلیغى اۆزوندن اؤنملى فرقلر گؤرونور. بو فرقلرین اوْلماسیندا فیزیكى شرطلر (ایقلیم اؤزللیكلری، یئر شكیللری، توْپراق خۇصوصیتی) و بشرى شرطلر (صنایعلشمه، كند تصرّوفاتی، یئرآلتى قایناقلاری، تۇریزم، نقلیات) اؤنملى روْل اوْیناییرلار. اهالینین چوخ اوْلدوغو بؤلگه مرمره بؤلگه‌سی، چوْخ آز اوْلدوغو بوْلگه ده دوْغو آنادولو بؤلگه‌سی‌دیر. مرمره نین چوخ اهالییه صاحب اوْلماسیندا ایىستانبول اؤنملى بیر روْل اویناییر.

آهالى سایی (۲۰۱۵) بؤلگه
۲۳.۶۰۸.۰۷۹ مرمره
۱۲.۳۸۱.۳۶۳ اىچ آنادولو
۱۰.۰۲۳.۵۴۶ اژه
۹.۹۰۶.۷۷۱ آغ دنیز
۸.۲۵۰.۷۱۸ گۆنئی دوْغو آنادولو
۶.۹۹۸.۹۹۸ قارادنیز
۵.۹۲۷.۶۳۰ دوْغو آنادولو

قایناقلار[دَییشدیر]