دانیشیق:الکتریک یوکو

بو مقاله نین دیلی بیزیم تورکجه دیلینده دگیل و آنادولو تورکجه سینده یازیلمیش دیر. بو مقاله ده و بو مقاله یه یؤنَلینَن مقاله نین آدیندا(الکتریکسئل یوک) تورکیه(آنادولو) تورکجه سینه خاص اولان اکدن ایشلنمیش دیر یعنی سَل و البتّه بو بیزیم تورکجه میزه چئوریلیرسه سئل دگیل، سَل و سال شکلینده اولابیلر و بو اکین صنعی و جعلی یا تورکجه نین اؤز اک لریندن اولماغیندا سؤزلر وار و نظره گلیر ت.د.ک. سونرادان بو اکی یارادیب و سابقه سیز دیر.— بو ایمضاسیز یازی H.ALIZADE Q (دانیشیق • چالیشمالار) طرفیندن آرتیریلمیش‌دیر.

من سئل اکین دگیشدیم اما مقاله‌نین آدی نه اولمالی دیر؟ ایلیکتیریکی یا ائلئکتیریکی یا ائلئکتیریکلیک؟--Arslanteginghazi (دانیشیق) ‏۱۰ سپتامبر ۲۰۱۵، ساعت ۱۱:۱۸ (UTC)

مقاله‌نین دوزگون آدی الکتریک یوکو اولمالی دیر. الکتریکی تورکجه قراماتیک باخیمدان یانلیش دیر و ی اکینین آرتیرماسی ایله هر ایسمدن صیفت یارادماق اولماز. الکتریک گیتاری کیمی. بیر ده قوراللار بیزه دئییر اِلِکتریک Elektrik نه ایلیکتیریک و یا ائلئکتیریک. Matreeks (دانیشیق) ‏۱۱ سپتامبر ۲۰۱۵، ساعت ۰۵:۵۸ (UTC)

ویکی‌میزین مقاله‌لرینین چوخوندا بیریم سؤزجوگو ایشلنیب‌دیر. Matreeks بی سیز نه‌دن بیریم یئرینه واحید یازیبسیز؟--Arslanteginghazi (دانیشیق) ‏۱۱ سپتامبر ۲۰۱۵، ساعت ۰۸:۴۲ (UTC)

ائله بیل من اوستده کی یازیمی امضاسیز یازمیشدیم، منیم امضامی قویاندان تشکر ائدیرم. Matreeks بی الکتریک یوکو یانلیش دیر الکتریکی یوک الکتریکی اولان یوک آنلامیندادیر.حامد (دانیشیق) ‏۱۱ سپتامبر ۲۰۱۵، ساعت ۱۲:۳۲ (UTC)

منیم نظریمه بیر مقاله نی یاراتمادان اؤنجه اونون اوزرینده بیراز آختاریش ائدیلمه لی دیر. بیر شئیین اوستونده شکّیمیز اولورسا ایلک اؤنجه قوراللارا باخیلمالیدیر. قوراللاردا اولمایان شئیه و دیلیمیزده یایقین اولمایان حالتلره راست گلیرسکسه آذربایجان جومهوریتینده ایشلنن دیل طرزی و قرامری بیزیم بوردا ایشلتدیگیمیز دیله ان یاخین اولدوغو ایچون اساس گؤتورولمه لیدیر. البته بو کؤمک آلماغیمیز گؤزو باغلی اولمامالی دیر و اؤز ایشلتدیگیمیز دیله یاخین اولمالی یا ائدیلمه لیدیر. بونو قوراللار دا بیزه دئییر. تورکیه ده ایشلنن دیل طرزینه ان سون مرحله ده روجوع ائتمه لی ییک. فارس دیلینده ده ایشلنن شکیلچیلردن و اکلردن ایستیفاده ائتمه مه لی ییک. بونلارین هامیسی قوراللاردا اعمال اولونوب. قوراللار یاخشی اوخونورسا و اونو یازانلارین باشقا یازیلاری دا گؤز اؤنونه آلینیب اوخونورسا بو سؤزلر تایید اولور و نئجه بیر دیل طرزی ایله یازیلاریمیزین آپاریلماسی باشا دوشولور. دئمه لی ایفراط و تفریطین قاباغی آلینمالی دیر. بوردا الکتریکی یوک یازیلاندا من تفریط گؤرورم، چونکو ی اکی فارس دیلیندن گتیریلیب بورایا. الکتریکسل ده یازدیقدا بیر ایفراط گؤز اؤنونه گلیر. سل سال شکیلچیسی یئنی تورکیه تورکجه سینده ایشلنن بیر اک دیر. آمّا الکتریک یوکو یازدیقدا بیزیم ساغلام تورکجه ایفاده ائدیلیر. بو قراماتیک قورولوشدا مینلرجه باشقا کلمه لر و کلمه بیرلیکلری قورولموش و آذربایجان جومهوریتینده و بیزیم تورکجه میزده ایستیفاده اولونور. Matreeks (دانیشیق) ‏۱۱ سپتامبر ۲۰۱۵، ساعت ۱۴:۵۸ (UTC)

ماتریکس بی، منیم نظریمه سیز مضاف‌الیه و صیفت آراسیندا کیریخمیسینیز، الکتریک یوکو صیفت یوْخ مضاف‌الیه مفهومونو ایفاده ائدیر، باخین:

۱- صیفت: بار الکتریکی = الکتریکی یۆک

۲- مضاف‌الیه: بار الکتریک = الکتریک یۆکو

بۇنا گؤره مقاله آدی الکتریکی یوک اوْلمالی‌دیر.--آلپ ار تونقا_✉ ‏۱۱ سپتامبر ۲۰۱۵، ساعت ۱۷:۴۳ (UTC)

عزیز یولداش. سیز فارس دیلی قرامری ایله تورکجه قرامرینی قاریشدیرمامالیسینیز. مضاف مضاف الیه فارس دیلینده اولور مثلا: کتاب علی. بیزیم دیلده اونا گنیتیو حالت دئییلیر: علینین کیتابی. بوردا هر ایکی سؤزجوک ایسم دیر. بار الکتریکی دئدیکده ایسه الکتریکی صیفت دیر بار اوچون. فارس دیلینده ی اکی ایله صیفت دوزلدیلیب بوردا. یا میدان الکترومغناطیسی کیمی. آذربایجان جومهوریتینده بونا دئییلیر الکتروماقنیت ساحه سی. بیز دئیه بیلریک الکترومغناطیس مئیدانی. نه اینکی دئیک الکترومغناطیسی مئیدان فارسجادان تقلید اولاراق. لکتروماقنیت بوردا اکسیز صیفت دیر دیلیمیزده. ایسمدن صیفت قاییرماق بیزیم دیلده نئچه حالتی وار بیری ده اکسیز حالت دیر. سیز بوردا دا داش کؤرپو یا پل سنگی کیمی مفهومو و گونش سیستمی یا منظومه خورشیدی دئمک ایله قاریشیق سالمامالیسینیز. ایندی بوتون آذربایجان جومهوریتینین اونیورسیتتلرینده دئییلیر الکتریک یوکو. الکتریک ساحه سی. الکتروماقنیت ساحه سی. تورکیه ده ده هم الکتریک یوکو دئییلیر و هم الکتریکسل یوک. هئچ کیم دئمیر الکتریکی یوک! فارس دیلی کیمی.Matreeks (دانیشیق) ‏۱۲ سپتامبر ۲۰۱۵، ساعت ۱۱:۰۲ (UTC)

عزیز اوستادلار، فارس دیلینده سؤزجوگون سونونا آرتیلان "ی" الکتریکی سؤزجوگونده "فارسجا: صفت مصدری" دۆزلدن "ی" دئییل‌می؟ دئدیگیم کیمی اولسا تورکجه‌ده لیق ایله لیک اکی ایشلتمه‌لیییک. قازاق تۆرکجه‌سنده الکتروماقنیتتیک اؤریس بونون اؤرنگی دیر (قازاق تورکجه‌سینده اکلرین باشلانیشیندا "ل" حرفی "ت" یا "د"یا چؤنر). باشقا تورک دیللرینده‌کی آدلارا باخاندا ماتریکس بی دییه‌ن دۆز نظره گلیر (الکتریک زاریادی یا الکتر قوْریلماسی) --Arslanteginghazi (دانیشیق) ‏۱۲ سپتامبر ۲۰۱۵، ساعت ۱۱:۲۲ (UTC)

ماتریکس بی، فارس دیلینده ده ایشلنن شکیلچیلردن و اکلردن ایستیفاده ائتمه مه لی ییک، کیمی سؤزلر بیزه یالاندان تعصبه ساری آپارار. دیل حوزه‌سینده بئله برک دانیشماق اوْلماز، بیزیم دیلیمیزین فارسجایا گؤره جوخلو اۆستونلوگو واردیر آنجاق اینانین بۇردا فارسجا قاباغیندا کم گتیریب‌دیر. وئردیگیم میثال چوخ آیدین‌دیر آنجاق بۇنا باخین:

فارسجادا دئییرلر، نوشته دانشنامه‌ای، ایندی تۆرکجه‌یه چئویرنده بیز نه دئیک، سیز دئدیگیز کیمی فارسجا شکیلچی‌نی ایشلتمه‌ییب، دایره‌المعارفی یازی یئرینه دایره‌المعارف یازی‌سی (سی/سو/و/ی) یازساق معنا بۆتونلوک‌له دییشیلیر( نوشته دانشنامه).--آلپ ار تونقا_✉ ‏۱۲ سپتامبر ۲۰۱۵، ساعت ۱۴:۳۸ (UTC)

آلپ ارتونقا بَی سوز تعصبدن یوخ دیلین اؤزللیگیندن گئدیر. بیز بیلمه‌دیگیمیز شئی وارسا اونون اوستونده دانیشماغی اوبیریلره تاپشیرا بیله‌ریک. نوشته دانشنامه‌ای اولور بیلیکلیک‌لیک یازی! بوردا یاریشماغا بیر شئی یوخدور کی بیری کم گتیره و یا ایضافه گتیره. هر دیلین اؤزللیگین باشاردیقجا قوروماق لازیمدیر. حؤرمتله--Ebrahimi-amir (دانیشیق) ‏۱۲ سپتامبر ۲۰۱۵، ساعت ۱۴:۴۷ (UTC)

آلپ ارتونقا جنابیندان بیر ریجا. بیزیم چوخ گؤزل یازیلمیش قرامر کیتابلاریمیز وار. هم بوردا. هم آذربایجان جومهوریتینده و هم تورکیه ده. سیز او کیتابلارین بیرینی اوخوسانیز هئچ واقت دئمزسینیز بیزیم دیل باشقا بیر دیلین قاباغیندا عاجیز دیر. بیر ده بو کی دائره المعاریف یازیسی یا نوشته دائره المعارفی ایله دائره المعاریفین یازیسی یا نوشته دائره المعارف آراسیندا سیز فرق قویمورسونوز. ایلک دئییلنی صیفت آنلامیندا ایکینجیسی آما گنیتیو حال دیر. Matreeks (دانیشیق) ‏۱۲ سپتامبر ۲۰۱۵، ساعت ۱۴:۵۹ (UTC)

آلپ ار تونقا جناب. سیزین بو ایشینیز واندالیزم دیر. دانیشیقی گئدن مقاله نین آدینی الکتریک یوکو ندن الکتریکلی یوک ائدیرسینیز بوردا بحثه قویماقدان اؤنجه.Matreeks (دانیشیق) ‏۱۲ سپتامبر ۲۰۱۵، ساعت ۱۵:۴۸ (UTC)

منجه بورادا نئچه مطلب و سؤز بیربیرینه قاریشمیش دیر؛

1) «الکتریکی» کلمه سی فارسجادیر و تورکجه سی نه دیر و بیز بونو فارسجا ایشلتملییک یوخسا تورکجه لشدیرملییک و بو مبحث له ایلگیلی اولان بو کی الکتریک و الکتریکی نین بیربیری ایله نه ایلگی و علاقه سی وار؟
2) «الکتریکی یوک» ترکیبی می دوزدور یوخسا «الکتریک یوکو»؟
منیم فکریمجه فارسجا «بار الکتریکی» ترکیبینده گلن ی اکی صفت یارادان اک دیر مثلا «کار کامپیوتری» ایندی بو ترکیبین تورکجه سی «کامپیونری ایش» یا یانلیشجا «بیلگی سایاری ایش» یا«بیلگی سایارا عاید اولان بیر ایش»دیر. گؤردوگونوز کیمی فارسجادا اولان بو ی اکی تورکجه معادلی اونودولوب و تورکیه ده سل/سال یارادیلیب و اصلی سی لیک/لیق دیر و اویغورلاردا ایندی بو اکدن ایشلدیرلر. دئمک بو ترکیب(بار الکتریکی) الکتریکی یوک شکلینده تورکجه میزه چئوریله بیلر. پورفوسور زهتابی نین آذربایجان تورکجه سی نین نحوینه ده باخابیلرسینیز.حامد (دانیشیق) ‏۱۳ سپتامبر ۲۰۱۵، ساعت ۱۷:۵۳ (UTC)

الکتریک کلیمه سی فارسجا دئییل.--Ebrahimi-amir (دانیشیق) ‏۱۳ سپتامبر ۲۰۱۵، ساعت ۱۸:۰۰ (UTC)

عزیز Ebrahimi-amir «الکتریک» کلمه سی فارسجا دگیل بیلیرم آنجاق «الکتریکی» کلمه سی ی اکی یاپیشاراق مسامحه ایله فارسجا حساب اولونابیلر. منیم مقصدیم کؤک جهتدن دگیل[دیر] یاپی سی و ساختاری جهتیندن ایدی.حامد (دانیشیق) ‏۱۴ سپتامبر ۲۰۱۵، ساعت ۰۹:۵۵ (UTC)

«سئل» یا «سال» سون‌ائکلری

«سال» سونئکی بیز ایشلدیریک. «قومسال» ائشیدمیبسینیز می؟ هانسی منطق دییر کی TDKده یارانان سؤزجۆکلر و ائکلر بیزیم دیله گلمه‌مه‌لیدیر؟؟ بیر دیل گلیشیر و یئنی سؤزجوکلری و ائکلری اؤزو یارادمالیدیر یوخسا بولار اؤزگه دیلدن گیرر. ندندی فارس دیلیندن گلن سؤزجوکلر و حتی گرامر اویغون گلیر اما تورکیه ده یئنی دیل گلیشملری چیرکین گلیر؟؟؟ منجه الکتریکسئل چوخ اویغوندور، تورکیه و آذربایجان دیلی بیربیرینه بنزمه‌سی داها یاخجی (دیلین گۆجو او دیلی آنلایانلارین سایی‌سیندادیر). قوزئی آذربایجان دیلی فارس، روس و عرب دیلیندن ائتکیلنیر، اۆزگونلوکله گرامرده چوخ یئرده باخمیرلار.

بونو «الکتریکی یوک» یازدیق، سونراسی نه؟ اؤرنک: Global Network ایچین نه یازاق؟ «دونیایی شبکه؟؟؟» یا «Global»سؤزجوگو تک گلنده ده فارس ترکیبین ایشلتملی اولوروق «دونیایی»!!!

AlperTeo (دانیشیق) ‏۲۹ اوکتوبر ۲۰۱۵، ساعت ۰۹:۳۴ (UTC)

الکتریک بیر صیفت دیر

ابنگیلیس دیلینده‌کی electric یا آلمان دیلینده‌کی elektrisch صیفت دیرلر و charge یا Ladung ایسملرینی تشریح ائدیرلر:

electric charge

elektrische Ladung

الکتریک کلمه سینین صیفت اولدوغونا باخمایاراق فارس دیلینده ی اکینین آرتیرماسی ایله الکتریکدن الکتریکی کیمی تقلیدی بیر صیفت دوزلدیلیر:

بار الکتریکی

بو فارس دیلینده یایقین بیر یانلیشلیق دیر. تورکیه تورکجه‌سینده ده بو ایجباری یانلیشلیغا راست گلمک اولور:

elektriksel yük

اوردا: elektrik yükü ده دئییلیر. آذربایجان جومهوریتینده دئییلیر:

elektrik yükü

بئله لیکله بیزیم الکتریک یوکو یازماغیمیز دوغرو گؤرسنیر. Matreeks (دانیشیق) ‏۸ نووامبر ۲۰۱۵، ساعت ۲۰:۵۷ (UTC)