راضیه شعبانی
| راضیه غلامی شعبانی | |
|---|---|
 Raziyə Qulami Şabani | |
| دوْغوم تاریخ | 21 آوریل 1925 تبریز |
| اؤلوم تاریخ | 28 ژانویه 2013 (87یاشیندا) کولن آلمان |
| اتنیک | آذربایجان تورکو |
| وطن‌داشلیق | آلمان |
| ایش | سیاستچی |
| حیات یوْلداشی | رضا ابراهیم زاده |
راضیه غلامی شعبانی (21 آوریل 1925، تبریز - 28 ژانویه 2013،کؤلن آلمان) - آذربایجانلی سیاستچی و فعال. آذربایجان دموکرات فیرقه‌سی و ایران توده پارتیاسی‌نین عوضولریندن اولان راضیه شعبانی ایران تاریخینده ایلک قادین سیاسی محبوس ساییلیر.
یاشاییشی و فعالیتی
[دَییشدیر]راضیه شعبانی 21 آوریل 1925-جی ایلده تبریز شهرینده آنادان اولوب. گله‌جک حیات یولداشی توده پارتیاسی‌نین فعالی رضا ابراهیم‌زاده ایله تانیش اولدوقدان سونرا سیاسی فعالیته باشلاییر. سونرادان او اؤزو ده توده پارتیاسی‌نین عوضوو اولور[۱]. اؤز یازدیقلارینا گؤره، او توده پارتیاسی و اونون رهبرلیگی ایله پروبلم‌لر یاشاییردی و آذربایجان خالقی‌نین قیامینا شاهید اولونجا، اونلارا قاتیلمیشدی. آذربایجان دموکرات فیرقه‌سینه عوضو اولدوقدان سونرا آذربایجان میلی حؤکومتینین فعال‌لاریندان اولور. او گونلرده، 20 یاشیندا گنج بیر قیز اولان راضیه خانیم اَینینه حربی فورما گئیه‌رک بئلینده کولت تاپانچاسی گزدیریردی[۲]. آذربایجان میلّی حؤکومتینین سوقوطوندان ایکی آی سونرا 1947-جی ایلین فوریه‌سینده تهراندا پهلوی رژیمی‌نین مأمورلاری طرفیندن حبس ائدیلیر. حبس اولوندوغو زامان حامیله ایدی. بیر مودت تهراندا ساخلانیلدیقدان سونرا تبریزه کؤچورولور. حؤکم اوخوندوقدا ایسه آرتیق اوغلو دونیایا گلمیشدی. 6 ایل‌لیک حبسیندن سونرا بیر مودت اؤلکه ده قالدیقدان سونرا 1955-جی ایلده شوروی اراضی‌سینه کئچیر بورادا او چوخدان موهاجیرتده اولان حیات یولداشینا قوووشور. 1979-جو ایلده باش وئرمیش اسلام اینقیلابیندان سونرا ایرانا گئری دؤنور. 8 ایل ده اورادا یاشادیقدان سونرا آذربایجانا کئچدیکدن سونرا آلمانا موهاجیرت ائدیر. موهاجیرتده اولدوغو دؤورده اؤز خاطیره‌لرینی قلمه آلیب کیتاب نشر ائتدیریر.[۳]
خاطیره‌لری
[دَییشدیر]موهاجیرتده اولدوغو زامان یازدیغی کیتابیندا اؤز خاطیره‌لرینه ده یئر وئرمیشدیر. خاطیره‌لرینده 1947-جی ایلده حبس ائدیلمه‌سی ایله باغلی یازیردی:[۱] [۴]
"من او واخت تهران شهرینده ایدیم. آذربایجانا هوجوم ائتدیکلری و خالقی قیریب اؤلدوردوکلرینده گیزلنمگه مجبور قالدیم. آنجاق سونرا توتولاراق 1947 فوریه‌سینده ایکی آیلیق اوشاغیم قارنیمدا ایکن زیندانا گؤندریلدیم. او زامان‌لار، قادین‌لارا مخصوص زیندان یوخ ایدی. ژنرال رزمارانین بینالاریندان بیرینی ایجاره ائدیب، زیندانا چئویرمیشدیلر. داها سونرالار، منی تهراندان آذربایجانداکی اوردو پروکورورلوغونا تسلیم ائتدیلر. بیرینجی حربی محکمه‌یه آپاریلدیغیم زامان اوغلوم 12 گونلوک ایدی. "
اؤلومو
[دَییشدیر]راضیه شعبانی ابراهیم‌زاده ژانویه‌نین 28-ده موهاجیرتده یاشادیغی آلمان‌ین کؤلن شهرینده 87 یاشیندا دونیاسینی دییشیب.[۵]
اتک یازی‌لار
[دَییشدیر]- ^ ۱٫۰ ۱٫۱ N.S (30 yanvar 2013). "Azərbaycan Demokrat Firqəsinin görkəmli üzvü Raziyə Şəbani İbrahimzadə 87 yaşında vəfat edib" Archived 2019-02-14 at the Wayback Machine.. gunaz.tv. 14 fevral 2019 tarixində arxivləşdirilib.
- ^ "یاد و خاطره ی راضیه غلامی شعبانی گرامی! azərb. Raziyə Qulami Şabanini unutmayın" (fars. ). tribunezamaneh.com. 14 fevral 2019 tarixində arxivləşdirilib.
- ^ "راضیه ابراهیم زاده؛ فراز و فرود هفتاد سال زندگی سیاسی" (fars. ). bbc.com. 29 yanvar 2013. 2019-02-15 tarixində orijinalından arxivləşdirilib.
- ^ Tural Elçin (8 fevral 2013). "1945-46-cı illərdə Azərbaycan Demokrat Firqəsinin üzvü olmuş Raziyə Şəbani İbrahimzadə". baxh.wordpress.com. 14 fevral 2019 tarixində arxivləşdirilib.
- ^ "راضیه غلامی شعبانی" (fars. ). citytomb.com. 14 fevral 2019 tarixində arxivləşdirilib.