رجب ابراهیمی

ویکی‌پدیا، آچیق بیلیک‌لیک‌دن
پرش به ناوبری پرش به جستجو

رجب ابراهیمی (فرهاد) آذربایجان شاعیرلریندن دیر. او 1314 ـ نجو ایلین آبان آییندا اردبیلین کورابازلی یا کورعباسلو کندینده دونیایا گلدی.[۱] اوستاد علی سلیمی ایله تانیشاندان سونرا، «آغلاما»، «آچیل سحر» و «آیریلیق» شعرلرینی یازدی. و استاد علی سلیمی بو شعرلره آهنگ قوشدو و خانم وارتوش(استاد سلیمی حیات یولداشی) تبریز رادیوسوندان بو آهنگ‌لری سسلندیردی.

اثرلری[دَییشدیر]

  • [آیریلیق]

شعرلریندن اؤرنک[دَییشدیر]

آیریلیق

فیکریندن گئجه لر یاتا بیلمیرم

بو فیکری باشیمدان آتا بیلمیرم

دئییرم چون سنه چاتا بیلمیرم

آیریلیق، آیریلیق، آمان آیریلیق

هر بیر دردن اولار یامان آیریلیق

اوزوندور هیجرینده قارا گئجه لر

بیلمیرم من گئدیم هارا گئجه لر

ووروبدور قلبیمه یارا گئجه لر

آیریلیق، آیریلیق، آمان آیریلیق

هر بیر دردن اولار یامان آیریلیق

یادیما دوشنده آلا گوزلرین

گویده اولدوزلاردان آلام خبرین

نئیله ییم کسیبدیر مندن نظرین

آیریلیق، آیریلیق، آمان آیریلیق

هر بیر دردن اولار یامان آیریلیق

آیریلیق دردینی چکمه ین بیلمز

یاردان آیری دوشن گوز یاشین سیلمز

دئییرلر اینتظار خسته سی اؤلمز

آیریلیق، آیریلیق، آمان آیریلیق

هر بیر دردن اولار یامان آیریلیق

نئجه کی ائلیمدن آیری دوشندن

سورار بیربیرینی گوروب بیلندن

حسرتله سیزلار یار داییم بو غمدن

آیریلیق، آیریلیق، آمان آیریلیق

هر بیر دردن اولار یامان آیریلیق

ایل لردی اوزاقام آرخام ائلیم دن

بلبلم دوشموشم آیری گولوم دن

جور ایله آییریب شیرین دیلیم دن

آیریلیق، آیریلیق، آمان آیریلیق

هر بیر دردن اولار یامان آیریلیق

اولوبدور بیگانه یاریم_ یولداشیم

غریبه ساییلیر سئوگیم – سیرداشیم

بوجاوان چاقیمدا آغاردیب باشیم

آیریلیق، آیریلیق، آمان آیریلیق

هر بیر دردن اولار یامان آیریلیق

منی آغلاداندان گولوش ایسته رم

آیری دوشنیمله گوروش ایسته رم

حصاری ییخماقا یوروش ایسته رم

آیریلیق، آیریلیق، آمان آیریلیق

هر بیر دردن اولار یامان آیریلیق

سئوگیلیک اولوبدور شانی فرهادین

سئوگی سی هاردادیر، هانی فرهادین

دییه ره ک چیخاجاق جانی فرهادین

آیریلیق، آیریلیق، آمان آیریلیق

هر بیر دردن اولار یامان آیریلیق

قایناقلار[دَییشدیر]