محمد بخاری

امام محمد البخاری (İmam Muhəmməd əl-Buxari) (دوغوم: 194 هجری ایلی ـ بخارا ـ وفات: 256) ـ "امام المحدثین" لقبی ایله ایسلام عالمینده تانینمیش ان بؤیوک محدث‌لردن.

یاشامی

ابو عبدالله محمد بن اسماعیل بخاری 194 ایلینده بوخارا شهرینده (اورتا آسیادا) دونیایا گؤز آچدی، اوشاقلیقدا آتاسینی الدن وئره‌رک آناسی کؤمگی ایله بؤیودو. 10 یاشیندا حدیث ازبرلمگه باشلایاراق 16 یاشیندا آناسی و قارداشی ایله مکه یه مهاجرت ائتدی. 6 ایل مکه و مدینه ده یاشادی. بو ایللرده دینی زمینه ده علم اؤیرنمگه چالیشدی. او حدیث توپلاماق و علم اؤیرنمک اۆچون شام، میصیر، الجزاییر، بغداد، بصره یه و خوراسانا گزیلر (سفرلر) دوزنله دی. نیشاپوردا اولارکن محمد بن یحیی دهلی ایله آرالاریندا فیکیر آیریلیغی اورتایا چیخدی. بخاری چوخلو علمی چالیشمالاردان و گزی (سفر) لردن سونرا دوغما شهری بخارایا گئری دؤندو. بخارانین والیسی خالد بن احمد زمینو ایله البخاری آرالاریندا اولان اختلافلاردان یانا او سمرقند شهرینه سورگون ائدیله رک 62 یاشیندا 256 ه. ق. تاریخینده دونیاسینی دگیشدی.

اثرلری

البخاری 18 کتابین یازاری ایدی. اونلارین داها اؤنملیسی ""صحیح بخاری" آدیلا مشهور اولان، "الجامع الصحیح" آدلی کیتابدیر. باشقا کیتابلار بونلاردیر: التاریخ الكبیر، التاریخ الأوسط، التاریخ الصغیر، خلق أفعال العباد، الضعفاء الكبیر، أسامی الصحابة، المبسوط، المسند الكبیر، الضعفاء الصغیر، و مختصر من تاریخ النبی(ص) و ساییره.