موموتارو
موْموْتاروْ (桃太郎؟، تورکجه. شافتالی اوشاق) – ژاپون فولکلوروندا پوپولیار قهرمان.[۱]
ناغیل[دَییشدیر]
ناغیلین تاریخی إدوْ دؤورونه قدر اوزانیر. موْموْتاروْ نهنگ بیر شافتالی‌نین ایچینده دونیایا گلیر. چای کناریندا پالتار یویاین اوشاق‌سیز بیر قوجا قادین آخان چایدان بو نهنگ شافتالینی آلیر. قادین و اری شافتالینی یئمک اوچون آچاندا اوشاغی تاپیرلار. اوشاق اونلارا جنّتدن اوغول‌لاری اولاراق گؤندریلدیگینی دئییر. جوتلوک اونا موْموْ (شافتالی) و تاروْ (عایله‌ده ان بؤیوک اوغول) سؤزلریندن عیبارت موْموْتاروْ آدینی وئریر.[۱]
ایل‌لر کئچندن سونرا موْموْتاروْ کمرینه اوچ عدد مئیوه‌لی بؤره‌ک تاخاراق قولدور بیر قروپ اولان اوْنی‌لر ایله دؤیوشمک اوچون ائودن آیریلیر و آدایا طرف یول آلیر. یولدا قارشیسینا دانیشان ایت چیخیر و کمرینده نه داشیدیغینی سوروشور. موْموْتاروْ ایته یانیندا ژاپونون ان یاخشی داری بؤره‌گی‌نین اولدوغونو دئینده ایت اونا بیر آز اوندان وئرسه، اونا یولداش‌لیق ائده‌جگینی دئییر. عئینی شکیلده بیر مئیمون و بیر قیرقووول دا موْموْتاروْیا قوشولور.[۱]
موْموْتاروْ و حئیوان یولداش‌لاری آداداکی اوْنی‌لرین قالاسینا گیریب دؤیوشمگه باشلاییرلار. موْموْتاروْ اوْنی‌لرین باشچیسینا غالیب گلیر. بئله‌لیکله، موْموْتاروْ و دوست‌لاری اوْنی لرین تالان ائتدیکلری خزینه‌نی اله کئچیریرلر و باشچینی اسیر آلیرلار. موْموْتاروْ ائوه قاییدیر و او زاماندان عاییله‌سی ایله بیرلیکده خوشبخت حیات یاشاییر.[۱]
موْموْتاروْ مدنیتده [دَییشدیر]
.jpg)
موْموْتاروْنون حکایه‌سی اساسیندا موختلیف کیتاب‌لار، فیلم‌لر و دیگر اثرلر ایستحصال اولونموشدور. 1885-جی ایلده هاسه‌قاوا تاکه‌جیروْ طرفیندن ایلک دفعه اینگیلیس دیلینه ترجومه ائدیلمیشدیر. حکایه‌نین منشایی اوکویاما پرفکتوراسی ایله سیخ باغلی‌دیر. حکایه‌ده کی اوْنی آداسی اولان اونیقاشیما گئنیش ماغارالارینا گؤره تاکاماتسو یاخینلیغینداکی مِقیجیما آداسی ایله علاقه‌لندیریلیر.[۱]
موْموْتاروْ ایله باغلی پوپولیار اوشاق ماهنیسی " ماموْتاروْ-سان نوْ اوُتا " ایلک دفعه 1911-جی ایلده یاییملانمیشدیر. یازاری آنونیم، بسته‌کاری تئییچی اوکانودور.[۱]
همچنین هر ایلین 5 مئی‌ینده موْموْتاروْ معبدینده موْموْتاروْ فستیوالی کئچیریلیر.[۱]
حربی تبلیغات[دَییشدیر]
موْموْتاروْ ایکینجی دونیا موحاریبه‌سینده موختلیف موحاریبه فیلم‌لرینده و جیزگی فیلم‌لرده ایستیفاده اولونموش پوپولیار پئرسوناژ ایدی. موْموْتاروْ ژاپونو، حئیوان‌لار وطنداش‌لاری، شئیطان فیقورو آمریکانی تمثیل ائدیردی. اونیقاشیما آداسی ایسه پؤرل هاربورو سیمبولیزه ائدیردی. ژاپونون گوجلو آمریکایا قارشی غالیب گله‌جگی، آما بونون اوچون وطنداش‌لارین حؤکومته دستک وئرمه‌سی‌نین لازیم اولدوغو وورغولانیردی. بونونلا باغلی چکیلمیش "Momotaro: Sacred Sailors" هم ده ایلک اوزون‌متراژلی آنیمئیشین فیلمی ایدی.[۱]