جعفر طالبی

ویکی‌پدیا، آچیق بیلیک‌لیک‌دن
پرش به ناوبری پرش به جستجو
جعفر طالبی
آد جعفر طالبی
قیسا بیلگی شاعیر
دوْغوم تاریخ ۱۳۴۳ گونش ایلی
ایسماعیل‌آباد، سولدوز
اؤلوم تاریخ ۱۳۹۴
سولدوز
مزارلیقی سولدوز
تحصیل قدیم مکتب

طالیب تخلصلو تورک شاعیری جعفر طالبی، درویش‌مسلک، "بیغلی محمد"ین اوغلو، ۱۳۴۳ -نجو گونش ایلینده سولدوزون کئچمیشده سئل‌باتیران ایسماعیل‌آباد کندینده آنادان اولموشدور. ۱۳۴۸-نجی گونش ایلینده آتا-آناسی ایله بیرلیکده اورادان کؤچوب، عجم کهریزه‌سینده یئرلشمیشلر. سئسی آدلی بیر روحانینین مکتبینده قورآن اوخوماغی اؤیره‌نیر، هابئله نهج‌البلاغه ایله تانیش اولور. بئله‌لیکله، یازیب اوخوماغا باشلاییر. سونرالار "کؤهول" کندینه کؤچور و اورادا ائوله‌نیر.

او، اؤز امه‌یی ایله بئش باش عاییله‌نی هر چتینلییه قاتلاناراق دولاندیریر. تاسوفلر اولسون کی، "جعفر"ین ایکی اوشاغی‌نین خسته‌لیی اونون یاشام یوکونو داها دا آغیرلاشدیریر. او چوخ چالیشیب آز تاپسا دا، دایما گولر اوز و مردلیکله کاسیب کوماسینی دولاندیریر.

شعیرلرینین خصوصیتلری و اثرلری[دَییشدیر]

"جعفر"ین شعیرلرینده قورآن، نهج‌البلاغه، عیرفان، فولکلور، حسرت و آغیر یاشام ایزلرینی گؤرمک اولار. ایگید، گؤزوتوخ و الی آچیق، هابئله دوستلوغوندا تمیز، امانتدار اولان شاعیر سولدوزون بیر چوخ گنج و یاشلی‌نسیل شاعیرلری ایله یاخیندان اونسیتده اولموشدور.

شاعیردن 4- کامیل شعیر دفتری و ایکی یاریمچیق قوشما قالمیشدیر. گون او گون اولسون کی، اونون بو ادبی ایرثی نشر اولوناراق سولدوزون ادبی خزینه‌سینه آرتیریلسین.

اؤلومو[دَییشدیر]

شاعیر جعفر طالبی ۱۳۹۴-نجو ایل، جوماآخشامی بهمن آیی‌نین ۸- نده صوبح نامازینی قیلدیقدان سونرا حاققا قووشور. روحو شاد، مزاری نورلا دولسون.

شعرلریندن نومونه‌لر[دَییشدیر]

طالیب، بو دونیا ردیفلی شعرینده بئله دئییر:

سنه بوْی وئرنده زامان گۆونمه،
گله‌نین دفترین یازیر بو دۆنیا.
دوْلوب-بوْشالاندا چاناقدان داشیر،
تیکدیین بیر باسدان قازیر بو دۆنیا.


ائدیر عزیزلرین گۆن به گۆن ذلیل،
هر ایشی حیکمتدیر، هر ایشی دلیل.
کؤهنه‌دن تزه‌نی تؤره‌دیب هر ایل.
طبیعت قوْینونا دۆزور بو دۆنیا.


بیر گۆنون گؤرمه‌دیم خئییرسیز-شرسیز،
گله‌نی پئشماندیر، گئدن خبرسیز،
کؤهنه‌ ده‌ییرماندیر، اۆیودور دنسیز،
باش قوْیوب داش داشا ازیر بو دۆنیا.


طالیبسان، اینسانی بولما نردیوان،
ازلدن بو حؤکمه وئرمه‌دی فرمان،
دؤنوم دؤنگه‌لرده واردی مین کروان،
دؤنوب اؤز یوْلوندان آزیر بو دۆنیا.


قایناقلار[دَییشدیر]