رستم فرزانه

ویکی‌پدیا، آچیق بیلیک‌لیک‌دن
پرش به ناوبری پرش به جستجو
رستم فرزانه
آد رستم فرزانه
قیسا بیلگی شاعیر
دوْغوم تاریخ ۱۳۵۶ گونش ایلی
فرقوزات، سولدوز
تحصیل اینگیلیس دیلی، دیلچیلیک

رستم فرزانه، بایار، ۱۳۵۶-نجی ایلده سولدوزون فرقوزات (فرخ زاد) کندینده آنادان اوْلموشدور. آتاسی قربانعلی آشیق صنعتی ایله مشغول اولدوغو اوچون ایلک یاشلاریندان شعر و صنعتله تانیش اوْلموشدور.

تحصیل[دَییشدیر]

ایلک و اورتا مکتبی دوغما کندینده و متوسطه‌‌نی نقده شهرینده بیتیرمیشدیر. تبریزده اینگیلیز دیلی اوزره لیسانس و همدان شهرینده دیلچیلیک اوزره یوکسک لیسانس آلمیشدیر. ایندی سولدوزدا اینگیلیز دیلی موعللیمی اولاراق چالیشیر.

تخلوص[دَییشدیر]

شئعیرده "بایار" تاخما آدینی ایشله‌تسه ده بونون آرتیق زامانینین کئچدیگینی دوشونور. اونون اوچون ده بیر سیرا شعرلرینده هئچ بیر تاخما آددان ایستیفاده ائتمیر[۱]. اؤنجه "آراز" تاخما آدینی ایشلتمیشدیر، آنجاق اؤزونون سؤزلرینه گؤره "آرازلار" چوخالینجا، تاخما آدینی دییشدیریب "بایار" آدینی ایشلتمه‌یه باشلامیشدیر.

شعرلریندن نومونه‌لر[دَییشدیر]

بیرینجی نومونه: بو گئجه من اؤله‏‌جم

بو گئجه من اؤله‏‌جم، قالمیاجام صاباحا.
بئله هیجران گئجه‌سی گؤرمیه‏‌جم بیر داها.
سنی بو گون‏دن بری تاپشیریرام آللاها،
گون گله‌جک غرورون گؤزلریندن آخاجاق،
منه بو ائتدیکلرین سنه چوخا باخاجاق.


صاباحادک جوجرر مزاریمین باش داشی،
قال یاشا سن دونیادا ایبلیس‏لرله یاناشی.
نانجیبین اؤنونده تؤکدوغون او گؤز یاشی،
منی مزاریمدا دا یاندیراجاق-یاخاجاق،
منه بو ائتدیکلرین سنه چوخا باخاجاق.


بو گئجه من اؤلورم الیم قالیر یاخاندا،
دیکسینمه‌‏سین گؤزلرین گؤزلریمه باخاندا.
عاصی روحوم سکسه‌نیب بدنیم‏دن چیخاندا،
بیر طوفان قوپاجاقدیر، بیر ایلدیریم شاخاجاق،
منه بو ائتدیکلرین سنه چوخا باخاجاق.


نه مدت‏دیر اوره‌ییم الینده زیندان چکیر،
زلی کیمی بو سئوگی داماریم‏دان قان چکیر،
دئمیرسن کی بو یازیق نئچه ایلدیر جان چکیر،
سانیرسان‏ می دؤشونه بیری مئدال تاخاجاق!؟
منه بو ائتدیکلرین سنه چوخا باخاجاق[۲].


ایکینجی نومونه: خوجالی فاجیعه‌سی

خوجالینی گؤروب دینمز.
کور اولوب گؤزو دونیانین.
سؤز منه قالسا دئیردیم:
ظالیمدیر اؤزو دونیانین.


قورتارمادیق اداسیندان،
آه- ناله صداسیندان،
ائرمنی قان- قاداسیندان،
قارادیر اۆزو دونیانین.


قاتیللر سرافراز گزر.
گۆنده مین بیر اویون بزر.
ییخیلانی ووروب- ازر،
آیاغی هوْزو دونیانین[۳].


اوچونجو نومونه: گلدیم "فرقوزات" کندینه

گلدیم "فرقوزات" کندینه
بیر قیز منه ال ائیله‌دی.
بنؤوشه‌لر قوینون آچدی،
نرگیزلر گل-گل ائیله‌‌دی.


دردی-غمی باشدان آتدیم،
ییخیلیب کؤلگه‌ده یاتدیم،
بیر شیرین یوخویا باتدیم،
بونو قیزیل گول ائیله‌دی.


من‌نن اولسایدی وارمازدیم،
شهرده بیر گون قالمازدیم،
بوردا قالسام قوجالمازدیم،
دؤوران منه فئل ائیله‌دی.


آغاجلارین آل لچه‌یی،
زمیلرین چال بیرچه‌یی،
دوزنلرین گول_چیچه‌یی،
"بایار"ی بولبول ائیله‌دی[۴].


قایناقلار[دَییشدیر]

  1. منیمله ایلگیلی (تورکجه). شعرلریم. یوخلانیلیب ۲۳ اسفند ۱۳۹۵.
  2. بو گئجه من اؤله‏‌جم (تورکجه). شعرلریم. یوخلانیلیب ۲۳ اسفند ۱۳۹۵.
  3. خوجالی فاجیعه‌سی (تورکجه). شعرلریم. یوخلانیلیب ۲۳ اسفند ۱۳۹۵.
  4. گلدیم "فرقوزات" کندینه (تورکجه). فیسبوک. یوخلانیلیب ۲۵ اسفند ۱۳۹۵.