واهاقن خاچاتوریان

واهاقن خاچاتوریان
Վահագն Խաչատուրյան
واهاقن خاچاتوریان 2022 ده
ارمنیستان‌ین 5. جومهور رییسی
موتَصدی
ایشه باشلادی 13 مارس2022
باش‌وزیر	نیکول پاشینیان
قاباقکی	آرمن سارکیسیان
یوکسک تکنولوژی‌لر صنایعسی وزیری
ایشده 4 آقوست 2021 – 3 مارس 2022
باش‌وزیر	نیکول پاشینیان
قاباقکی	هایک چوبانیان
سونراکی	داویت شاکیان
ایروان بلدیه رییسی
ایشده 4 دسامبر 1992 – 22 فوریه 1996
قاباقکی	هامبارتسوم قالستیان
سونراکی	آشوت میرزویان
شخصی بیلگیلر
دوغوم	۲۶ ژوئیهٔ ۱۹۵۹ ‏(۶۴ یاش) سیسیان, ارمنیستان شوروی سوسیالیست جومهوریتی, شوروی
سیاسی حزبی	بی‌ طرف سیاستچی
آیری سیاسی باغلانتیلاری	ارمنیستان میلی کونگره‌سی (2013–2022)
حیات یولداشلاری	آناهیت میناسینان
پئشه	سیاستچی

واهاقن قارنیکی خاچاتوریان (26ژوئیه 1959، سیسیان) — ارمنیستان سیاستچیسی، 3 مارس 2022-جی ایلدن بری ارمنیستان پرزیدنتی. 2022-جی ایل مارسین 3-ده یوکسک تکنولوژی‌لر صنایعسی وزیری واهاقن خاچاتوریان مجلیس طرفیندن ایکینجی توردا ارمنیستان پرزیدنتی سئچیلیب.

یاشاییشی

  واهاقن خاچاتوریان 22 آوریل 1959-جو ایلده قاراکیلیسادا (سیسیان) آنادان اولوب. 1975-1980-جی ایللرده ایروان خالق ایقتیصاد موسیسه‌سینی ایقتیصادچی ایختیصاصی اوزره بیتیریب. 1980-1981-جی ایلده شوروی اوردوسوندا خیدمت ائدیب. 1981-1989-جو ایللرده ایرواندا  " رازدانماش "  ایستحصالات بیرلیگینده ایقتیصادچی ایشله‌ییب. 1989-1992-جی ایللرده  " مارس "  دؤولت موسیسه‌سینده شؤعبه  مودیری، داها سونرا باش مودیر یاردیمچیسی اولوب.

سیاسی فعالیتی

  واهاقن خاچاتوریان 1992-1996-جی ایللرده ایروانین بلدیه رییسی و ارمنیستان پرزیدنتی لئوون تر پتروسیان‌ین موشاویری اولوب. تر پتروسیان‌ین ایستعفاسیندان سونرا ایقتیصادی مسله‌لر اوزره موستقیل موتخیصیص کیمی چیخیش ائدیب. 1996-1999-جو ایللرده مجلیس نوماینده‌سی اولوب. 2007-جی ایل ارمنیستانداکی مجلیس سئچکی‌لرینده  "ایمپیچمنت"  بلوکونو تمثیل ائدیب. بو بلوکدا بیرلشن پارتیالارین اساس طلبی همین واخت ارمنیستان پرزیدنتی اولان روبرت کؤچریان و باش وزیر سرژ سارقسیان‌ین ایستعفاسی ایدی. بلوکون سئچکی سیاهیسی نین ایلک آدی حاضیرکی باش وزیر نیکول پاشینیان اولوب. 2021-جی ایلده واهاقن خاچاتوریان یوکسک تکنولوژی‌لر صنایعسی وزیری وظیفه‌سینی توتاراق پاشینیان حؤکومتی نین عوضوو اولوب. 2022-جی ایلده ارمنیستان پرزیدنتی آرمن سرکیسیان ایستعفا وئردیکدن سونرا مجلیسده چوخلوق تشکیل ائدن نیکول پاشینیان‌ین  " منیم موقاویله‌م‌"  فراکسیونونون بی‌طرف اولان واهاقن خاچاتوریانی پرزیدنت‌لیگه نامیزد کیمی تکلیف ائدیب. 3 مارس 2022-جی ایلده کئچیریلن سئچکی‌لرین ایکینجی توروندا مجلیسین 107 نوماینده‌سیندن 71-ی ایشتیراک ائدیب و اونلارین هامیسی خاچاتوریانا سس وئریب. بئله‌لیکله، واهاقن خاچاتوریان ارمنیستانین 6-جی پرزیدنتی سئچیلیب. 

  ارمنیستاندا هانسی سیاسی پروسه‌لرین باش وئرمه‌سیندن آسیلی اولمایاراق، خاچاتوریان همیشه وظیفه  صاحیبی اولوب. زامانی، شراییطی دوزگون قیمتلندیرمگی باجاران شخص کیمی تانینیر. او، قورباچووون یئنی‌دنقورما سیاستی‌نین ارمنیستانداکی پارلاق، آپاریجی گنج تبلیغاتچی‌لاریندان اولوب. شوروی‌نین لاخلادیغینی حیسّ ائدن خاچاتوریان فورصتی الدن وئرمه‌یرک، میلّی آزادلیق حرکاتینا قوشولوب، پتروسیان‌لا بیرلیکده ایشله‌ییب. 1988-جی ایلده قاراباغدا ارمنی سپاراتیزمی باش قالدیراندا خاچاتوریان سئچیم قارشی‌سیندا قالیب. یا ارمنیستاندا گونو-گوندن نوفوذو آرتان "قاراباغ کلان"-ینا قوشولمالی، یا دا بؤلگه‌ده ایکینجی ارمنی دؤولتی نین یارادیلماسی ایدئیاسینی دستکله‌مه‌ین پتروسیان‌ین یانیندا اولمالی ایدی. او، ایکینجی یولو سئچدی. واهاقن خاچاتوریان دیگر ارمنی سیاستچی‌لریندن فرقلی اولاراق آذربایجانا قارشی عیرقچی چیخیش‌لار ائتمه‌ییب، مدنی قونشولوغون طرفداری اولوب. حتّی 1998-جی ایلده پتروسیان دئوریلندن سونرا دا خاچاتوریان  " قاراباغ کلانی "  ایله امکداشلیق ائتمه‌ییب. 

  واهاقن خاچاتوریان هئچ واخت فعّال سیاسی فعالیتله مشغول اولماییب. ایروان‌ین بلدیه رییسی اولدوغو زامان دؤولت مولکیتی‌نین اؤزل‌لشدیریلمه‌‌سینده موهوم رول اویناییب. اودور کی، ارمنی اولیقاردلاری آراسیندا اونون بؤیوک نوفوذو وار. خاچاتوریان پرزیدنت سئچیلنه قدر ارمنیستانین یوکسک تکنولوژی‌لر صنایعسی وزیری ایدی. وزیر کیمی اونون قارشیسینا قویولان اساس طلب‌لردن بیری ده ارمنیستاندا یئنی حربی PUA-لار وPUA-لاردان مودافیعه  قورغولاری یاراتماق ایدی. لاکین ارمنیستانین میلیون‌لارلا دولارا باشا گلن پوا ایستحصالی پروقرامی تامامیله اوغورسوزلوغا دوچار اولوب.