اوروپا (آی)

ویکی‌پدیا، آچیق بیلیک‌لیک‌دن
ناسانین هابل تلسکوپونون 1996 و 2016 جی گؤرونتولری اوزوندن، اوروپا آییندا، قالین بوزلار آلتیندا درین مایع سو اوقیانوسلاری نین اولماغی اونایلاندی

اوروپا یا ایکینجی ژوپیتر (اینگیلیسجه. Europa و Jupiter II) ژوپیتر گزَگنی نین (موشتری سیاره سی) ان یاخین آیی و قالیلئو تاپان آیلاری نین دؤردونجو کیچیک آیی، و گونش سیستمی نین آلتینجی ان بؤیوک آیی دیر. اوروپا آیی‌نی 1610جی ایلده قالیلئو تاپدی.  اوروپا یئرین آییندان بیر آز بالاجا دیر، سیلیکات، بوز-سولو قایالاردان دوزَلیب ، و دمیر - نیکل داشلاری دا واریدیر.

اوروپادا سو و یاشام

اوروپانین ایچی و سطحینده کی بوز اؤرتولو اوقیانوس

موشتری نین بو آیینا آستروبیولوقلارین ماراغی سون ایللر داها دا آرتمیش‌دیر. 1996-جی ایلده ژوپیتر گزَگنینی آراشدیرماق اوچون گؤندریلن قالیلئو اوزای گمی‌سی(فضا سفینه سی) اوروپانین آرخا طرفی‌نین گؤرونتوسونو یئره گؤندرمیشدی. بو شکیلده بوزلا اؤرتولو اوقیانوسون اولدوغو آیدین گؤرونوردو. باخمایا‌راق کی، اوروپانین اوزونده حرارت یئردکی یاشام فورماسی اوچون چوخ آشاغی‌دیر، آستروبیولوق‌لار همین اوقیانوسون جان‌لی‌لار اوچون یاشاماق ائوی اولا بیلَجگینی سؤیلییرلر. یئرین اؤزونده بعضن جانلی‌لارین ائله اکوسیستم‌لرینی آشکار ائدیرلر کی، یاشامین یالنیز یئرده مومکون اولماسینی بیر داها شوبهه آلتینا آلیر. اؤرنک اوچون، یئرین چوخ درین قات‌لاریندا، سوخورلاردا یالنیز سیلیسیوم المنتی (عنصر) ایله غذا یئیین و گلیشَن باکتریلر تاپمیش‌لار. بورادا دوروم ائله‌دیر کی، بیزه بللی اولان جانلینین وارلیغی بو سوخورلاردا غیر مومکون‌دور. باشقا بیر اؤرنک، وولکانلیقلار بعضی حال‌لاردا وولکان‌لارین کراترلرین‌دن(باتمیش یئرلری) گؤتورولموش نومونه‌لرده باکتریلرین اولدوغونو کشف ائدیرلر، رادیو اکتیو رئاکتورلاریندا، چوخ یوکسک تشعشوعون اولماسینا باخمایا‌راق، بعضی باکتریلرین یاشادیغینی معین ائتمیش‌لر. ایندی ناسا کالیفورنیا داغ‌لاریندا، آمئس آراشدیرما مرکزینه اؤزل آستروبیولوگی قورومو تاسیس ائتمیش‌دیر. ناسا-نین باشقا 11 قوروملاری ایله سیخ امکداش‌لیق ائدن بو اینستیتوتون عالیم‌لری بو یئنی ساحه نی گلیشدیرمک فیکرینده‌دیرلر.


گؤرنتولر

قایناق

  • اینگیلیسجه و آذربایجان تورکجه‌سی ویکی پدیا صفحه‌لری