ترزا آنا

ویکی‌پدیا، آچیق بیلیک‌لیک‌دن
MotherTeresa 094.jpg

ترزا آنا (بوتون آدی کلکته لی ترزا آنا، اصل آدی آقنس قونجا بویاچی، آلبانجا. Agneze Gonxhe Bojaxhiu)، کاتولیک راهیبه ایدی. او راهیبه لر توپلانتیسی اولان و یوخسوللارا، مریضلره قوللوقچولوق شفقت اؤدولو(جایزه)نون یارادیجی سی اولاراق، نوبئل باریش اؤدولو آلیبدیر. ترزا آنا کاتولیک کلیساسی طرفیندن موقددسلر سیراسینا گیرمیشدیر. او 1997جی ایلده آمریکا بیرلشمیش اوستانلرین اوستون اؤدولو اولان کونقرئسین قیزیل میدالی نی دا آلیبدیر.

یاشامی[دَییشدیر]

اصل آدی آقنئس قونژا بویاژو (آقنس قونجا بویاچی) اولان ترزا آنا عوثمانلی ایمپراتورلوغونون سون ایللرینده، 1910 آوقوست آیی نین 26سیندا مقدونیه نین اوسکوپ بؤلگه سینده دوغولموشدور.

آقنئس گنج ایکن قارداشلار آدلی یئرده تشکیلاتا قوشولموشدو. کاتولیک راهیبین باشچیلیغی ایله کئچیریلن تؤرنلرده قاتیلان آقنئس میسیونئرلره ماراق گؤسترمه یه باشلادی.

17 یاشی اولاندا تانری طرفیندن اونون قارشیسینا موعییَن گؤرَولرین قویولدوغونو ادعا ائتدیǃ ایرلندین لورئتتو آدلی میسیونر قورومونا قوشولدوقدان سونرا ترزا آدینی گؤتوردو.

هیندوستاندا موقددس مئری اوخولوندا دین درسلر کئچمه یه باشلادی. 1946جی ایلده ائله بو اوخولون اؤندری وظیفه سینه کئچدی.

بیر دؤنم ایشلَدیکدن سونرا شیشمه (وَرَم) مریضلیگنه توتولان ترزا آنا داها اؤیرتمنلیک ائده بیلمه دی و ایستراحت ائله مه سی اوچون هیندوستانین باشقا بیر شهری، دارجیلینگه گؤندریلدی. اؤز دئدیگینه گؤره ، اوردا مریضلیگی ایلکه ساواش آپاران ترزا آنایا تانریدان ایکینجی وَحی گلدی.

"اوخولدا ایشیمی دایاندیرمالی و یوخسوللارلا بیرلیکده ایشلَمَلی، اونلارین آراسیندا یاشامالی ایدین. بو بویوروق (امر) ایدی. هارا عایید اولدوغومو بیلیردیم، آنجاق اورا نئجه گئدَجَییمی بیلمیردیم."

1948جی ایلده ترزا آنانین لورئتتا قوروموندان آیریلماسینا و کلکته یه باش راهیبلیگین نظارتی آلتیندا دئدیگی وَحیین یئرینه یئتیریلمه یبنه ایجازه وئردی.

ترزا آنا، کاسیب آییله لرین اوشاقلارینا درس دئمه یه باشلادی. عئینی زاماندا طیببین اساسلارینی اؤیرندی و مریضلرین  ائولرینده گئدرک اونلارین موعالیجه اولونماسینا یاردیم ائله دی. 1949جی ایلدن باشلایاراق اسکی اؤیرنجیلریندن بیر سایی سی اونا قوشولدو.

ترزا آنا و یانینداکیلار مریضخانالاردا موعالیجه اولونا بیلمه یَن و کوچه لرده اؤلوم-دیریم موباریزه‌سی آپاران اونلارلا کیشی، قادین، اوشاقلا قارشی‌لاشدی‌لار. اونلار بیر ائو توتاراق، سفالت ایچینده، اؤلوم آیاغیندا اولان اینسان‌لارا کؤمک ائتمه‌یه باشلادی‌لار. 1950-جی ایلده کیلیسانین حیمایتی ایله کلکته خئیریه‌چی میسیونئرلر توپلومو یاراتدی‌لار.

1952-جی ایلده کلکته بلدیه‌سی‌نین وئردیگی اراضیده بیرینجی اؤلو ائوی آچیلدی. ترزا آنانین 12 نفرله بیرلیکده یاراتدیغی بو قوروم، اوزون ایللر عرضینده، مین‌لرله کؤنوللوسو ایله بیرلیکده دونیانین 450 نوقطه‌سینده یوخسول‌لارا کؤمک‌لیک گؤسترن بؤیوک بیر حرکاتا چئوریلدی.

ترزا آنا کلکته‌دن نیویورکا قدر، هر یئرده، اؤلوم آیاغیندا اولان‌لار و آتیلمیش‌لار اوچون موعالیجه ائولری آچدی. ایلک دفعه اولاراق قیچس قوربان‌لاری اوچون خسته‌خانالار یارادان‌لاردان بیری اولدو. 45 ایل عرضینده دونیا میقیاسیندا یوخسول‌لارا، اؤلمک اوزره اولان‌لارا و آتیلمیش‌لارا کؤمک ائتدی.

تئرئزا آنا 1979-جو ایلده نوبئل سوله موکافاتینا لاییق گؤرولدو. اونا گؤردوگو ایشلرینه گؤره تکجه نوبئل یوخ، بیر چوخ باشقا اؤدوللر ده وئریلدی.

ترزا آنا نوبئل اؤدولونو تقدیم ائدیلمه‌سی زامانی عنعنوی اولاراق وئریلن قوناقلیقدان ایمتیناع ائتدی و 6 یوز مین دول‌لارلیق فوندون کلکوتته‌لی یوخسول‌لارا باغیشلانیلماسینی ایسته‌دی. بو پول یوزلرله اینسانی بیر ایل بویونجا دویوزدورماغا بس ائده‌جکدی.

ترزا آنا اؤدوللرین آنجاق احتیاجی اولان‌لارا بیر خئییری اولدوغو زامان اؤنم داشیدیغینی دئیردی. 1980-جی ایلدن اعتباراً دونیانین هر یعنیندا، نارکوتیک ایستیفاده‌چی‌لرینه، فاحیشه‌لر و ایشکنجه‌یه مروز قالمیش قادین‌لارا کؤمک اوچون آچیلان خسته‌خانالارین، کیمسه‌سیز اوشاق‌لار اوچون تیکیلن اوشاق ائولری‌نین و مکتب‌لرین سایی آرتماغا باشلادی.

ترزا آنا 1991-جی ایلده ایلک دفعه اؤز وطنی اولان ایندیکی سیربیستانا گئری دؤندو و بورادا بیر مریضخانا آچدی. بو ایللر عرضینده هیندوستاندا 168 خسته‌خانا آچیلمیشدی. 

3 فوریه 1994-جو ایلده آمریکا سئنا و کونقرئس حیمایتی ایله قورولموش اولوسلارآراسی  دعا یئمیینده ترزا آنانین آبورت حاقدا دئدیگی سؤزلر هامینی تججوبلندیردی: “لوطفن، اوشاق‌لاری اؤلدورمیین. من اونو ایستییرم. اونلاری منه وئرین”. 

ترزا آنا اتیوپی ده کی آجلارا، چئرنوبیلده کی رادیاسیون و ائرمنیستان‌داکی زلزه‌له قوربان‌لارینا کؤمک ائتمک اوچون بو اؤلکه‌لرده اولدو. 1996-جی ایلین دسامبر آییندا اونا آمریکا نین افتخاری وطنداشی وئریلدی.

1997-جی ایلده وفات ائدن ترزا آنا سون گونونه قدر یاخشی‌لیق، یوخسول‌لارا کؤمک ائتمک اوچون فالیت گؤستردی. اونون گؤردوگو ایشلر اینسان‌لیق اوچون اصل نومونه ایدی.

 او دئییردی: “آنجاق بیر تانری وار و او، هر کسین تانری‌سی‌دیر. تانرینین قاباغیندا هر کس برابردیر. بیر هیندلییه داها یاخشی بیر هیندلی، بیر موسلمانا داها یاخشی بیر موسلمان، بیر کاتولیکله دایا یاخشی بیر کاتولیک اولماغا کؤمک گؤسترملی ییک."

قایناقلار[دَییشدیر]

  • ترزا آنا افسانه سی، کولیس دات آز سایتی