تورکمان قصبهسی
| بیلگیلر | |
|---|---|
| اؤلکه |  ایران |
| اوستان | غربی آذربایجان |
| بؤلگه | اورمیه |
| بؤلوم | مرکزی |
| قصبهنین مرکزی | تورکمان |
| یارادیلمیش ایلی | ۱۹۸۷-جی ایل |
| اهلی | ۱۰٬۰۱۷ نفر |
| کند ساییسی | ۴۰ |
تورکمان قصبهسی اورمیه بؤلگهسینین، مرکزی بؤلومونون شرق حیصهسینده یئرلشیر. بو قصبه تاریخی باراندوز ماحالینا داخیلدیر.
تاریخ
[دَییشدیر]ایندیکی تورکمان قصبهسینین یئرلشدیگی اراضی تاریخاً اورمیه بؤلگهسینین جنوب و جنوب شرق حیصهسینی تشکیل ائدن باراندوز ماحالینا داخیل اولاراق؛ ۱۹۸۷-جی ایلده قصبه استاتوسو آلمیشدیر.[۱]قصبه اؤز آدینی مرکز تورکمان کندیندن آلمیشدیر.
تاریخی عابیدهلر
[دَییشدیر]- نظرآباد قالاسی: بو قالانین قوله و حاصارلارینین بیر قیسمی ۲۰۱۱-جی ایلینه قدر موجودلوغونو قورویوب ساخلاسا دا همین ایل ده یئرلی اهالی طرفیندن داغیدیلاراق یاشاییش بیناسینا چئویریلمیشدیر (اوزهرینده یاشاییش ائوی قورولموشدور). نظرآباد کندینین آدی ۲۰-جی میلادی عصرین ۵-جی اون ایللیگینه قدر قالا آدلانیرمیش. نظرآباد قالاسی اورمیه شهرینین اطرافینداکی قالالاردان بیری اولاراق؛ بؤلگهنین تهلوکهسیزلیگینی تأمین ائتمکده اؤنملی و بؤیوک بیر رول اوینایارمیش.
- جئیران - جبل قبریستانلیغی: بو قبریستانلیق اورمیه شهریندن ۲۵ کیلومتر آرالی یئرلشرک؛ اورمیه - نقده یولونون ساغ یانیندا و عئینی آدلی کندلرین یاخینلیغیندا یئرلشیر. یئرلی اهالینین دئدیکلرینه گؤره بو قبریستانلیق قدیم تاریخه مالیکدیر؛ بورادا یئرلشن اسکی قبیر داشلاری دا ائله بو فاکتی تصدیقلهییر. جئیران - جبل قبریستانلیغی جیلولار و کوردلرین ۲۰-جی عصرین ایلک یاریسیندا هجومو نتیجهسینده حیاتلارینی ایتیرن گوناهسیز اینسانلارین دفن ائدیلدیگی یئردیر.
جغرافیا
[دَییشدیر]تورکمان قصبهسی اورمیه شهریندن جنوب شرقده یئرلشرک؛ تاریخی باراندوز ماحالینین شرق حیصهسینی تشکیل ائدیر. بو قصبه اورمیه گؤلونون شرقی ساحیلی بویونجا یئرلشرک؛ اراضیسینین بوتونونو دوزنلیکلر تشکیل ائدیر. قصبه اراضیسینین دنیز سویهسیندن یوکسکلیک شرقده اورمیه گؤلونون ساحیلینده ۱۲۷۳ متردن؛ غربده ۱۲۹۱ متره قدر دَییشیر. تورکمان قصبهسینین کندلرینین دنیز سویهسیندن عمومی یوکسکلیگی اورمیه شهریندن آزدیر. تورکمان قصبهسینین عمومی ساحهسی ۱۴۲/۷۹۸ کوادرات کیلومتر (کیلومتر مربع) اولاراق اورمیه بؤلگهسینین مرکزی بؤلومونون اراضیسینین تخمیناً ۹٫۱٪-نی تشکیل ائدیر. قصبهیه ۴۰ کند داخیل اولاراق؛ قصبهنین مرکزی اورمیه شهریندن ۱۵،۵ کیلومتر آرالی یئرلشن تورکمان کندیدیر.[۳]
اهالی
[دَییشدیر]۲۰۱۶-جی ایلین معلوماتلارینا گؤره قصبهنین ۴۰ کندینده ۱۰،۰۱۷ نفر[۴]یاشاییر (۳،۰۸۸ عائیله).
اتنیک و دین
[دَییشدیر]قصبه اهالیسینین بؤیوک چوخلوغونو تورکلر تشکیل ائدیر. تورکلر قصبهنین بوتون ۴۰ کندینده یاشاماقلا؛ ۳۵ کندین اهالیسینی ائللیکله تشکیل ائدیر و ۵ کندده باشقا میللتلر ایله بیرلیکده یاشاییرلار. قصبهنین سردری، باباری و نئیبین کندینده کئچمیشده تورکلر ایله خیریستیان آیسورلار بیرلیکده یاشایاراق؛ آیسورلارین باشقا اؤلکه و بؤلگهلره کؤچمهسی ایله یاخین بیر تاریخده گلمه کوردلر یئرلشیبلر و حال حاضیردا بو اوچ کندده تورک اهالی گلمه کوردلر ایله بیرلیکده یاشاییر. آز سایلی آیسور خالقینین نمایندهلری کئچمیشده قصبهنین سردری، باباری، دارباری و نئیبین کندلرینده یاشاسالار دا؛ ایندیلیکده سادهجه قصبهنین اردیشه و تکه کندلرینده تورکلر ایله بیرلیکده یاشاییرلار. قصبه کندلرینده یاشایان اهالینین بؤیوک چوخلوغو ایسلامین شیعه مذهبینه باغلی اولان تورکلردیر. سادهجه نئیبین کندیندکی تورک اهالینین بیر حیصهسی سوننو شافعی مذهبینه اعتیقاد ائدیر. ائلهجه سون ایللرده قیسماً قصبهنین سردری، باباری و نئیبین کندلرینده مسکونلاشمیش کوردلر سوننو شافعی ایناناراق؛ قیسماً قصبهنین اردیشه و تکه کندلرینده یاشایان آز سایلی آیسورلار آراسیندا خیریستیانلیق یایغیندیر[۵][۶]
کندلر
[دَییشدیر]قایناقلار
[دَییشدیر]- ↑ تاریخ تصویب ایجاد و تشکیل 20 دهستان شامل روستاها، مزارع و مکانهای در شهرستان ارومیه تابع استان آذربایجان غربی. آرشیولنیب اصلی نۆسخهدن on 2025-11-02. یوْخلانیلیب2026-01-23.
- ↑ نگاهی به محال باراندوزچای و محال دول اورمیه، علی بابایی نیولویی، انتشارات آینا، صفحه ۱۹۲، ۱۹۴، ۲۱۱، ۲۲۵
- ↑ نگاهی به محال باراندوزچای و محال دول اورمیه، علی بابایی نیولویی، انتشارات آینا، صفحه ۳۴
- 1 2 قصبه اهالیسی.
- ↑ فرهنگ جغرافیایی ایران، حسنعلی رزم آرا، انتشارات دایره جغرافیایی ستاد ارتش، جلد چهار، استان ۳ و ۴ آذربایجان، صفحه ۶۹ و ۲۶۷
- ↑ نگاهی به محال باراندوزچای و محال دول اورمیه، علی بابایی نیولویی، انتشارات آینا، صفحه ۱۲۷ و ۱۲۸
- ↑ نگاهی به محال باراندوزچای و محال دول اورمیه، علی بابایی نیولویی، انتشارات آینا، صفحه ۱۲۷ و ۱۲۸