ارتوغرول عثمان

ارتوغرول عثمان
عثمانلی سولاله‌سی‌نین ۸-جی باشچی‌سی
حؤکوم	۱۲ مارس ۱۹۹۴ – ۲۳ سپتامبر ۲۰۰۹
قاباقکی	محمد اورخان
سوْنراکی	عثمان بایزید
دوغوم	۱۸ آقوْست ۱۹۱۲ ایستانبول، عثمانلی ایمپیراتورلوغو
اولوم	۲۳ سپتامبر ۲۰۰۹ (۹۷ یاش) ایستانبول، تورکیه
دفن	ایکینجی محمود توربه‌سی، ایستانبول
حیات یولداشی	گولدا تورسکوْی زینب ترزی
سولاله	عثمانلی
آتا	محمد برهان‌الدین افندی
آنا	عالیه ملک خانیم‌افندی

ارتوغرول عثمان عثمان‌اوْغلو (د. ۱۸ آقوْست ۱۹۱۲؛ ایستانبول، عثمانلی ایمپیراتورلوغو - اؤ. ۲۳ سپتامبر ۲۰۰۹؛ ایستانبول، تورکیه)، سولطان ایکینجی عبدالحمیدین نوه‌سی و شاهزاده محمد برهان‌الدین افندی‌‌نین اوْغلودور. آناسی ایسه عالیه ملک خانیم‌افندی دیر.

حیاتی

ارتوغرول عثمان، ایکینجی عبدالحمیدین نوه‌سی، شهزاده محمد برهان‌الدین افندی‌نین اوْغلودور، آناسی ایسه عالیه ملک نازلی‌یار خانیم‌افندی دیر. ۱۹۲۴ده وین ده تحصیلی‌نی سۆردۆرۆرکن، خیلافتین لغو اولماسی‌نین آردیندان عثمانلی سولاله‌سی بۆتۆن فردلری ایله بیرلیکده تورکیه‌دن سۆرگۆن ائدیلدی. بۇ تاریخدن سوْنرا ۶۸ ایل تورکیه‌یه دؤنمدی.

وین‌دن سۆنرا پاریسه یئرلشن شاهزاده، پاریس سیاسی بیلیم‌لر انستیتوسوندا تحصیل گؤردو. داها سوْنرا ۱۹۳۳ تاریخینده باباسی ایله آمریکا بیرلشمیش ایالتلرینه یئرلشدی. باباسینین ۱۹۴۹ ایلینده اؤلوموندن سوْنرا ۱۹۵۲ ایلینده کانادا مرکزلی بیر معدن‌چیلیک شیرکتی قۇردو. بۇردان سوْنرا دورومو یاخشی اوْلاراق یاشادی و عاییله‌نین دیگر اۆیه‌لری کیمی سؽخؽنتی چکمدی. ۱۹۹۱ ایلینده عثمانلی خاندانی ایله بنزر بیر عاقیبتی یاشایان افغان سلطنت عاییله‌سیندن پرنس عبدالفتاح ترزی و پاکیزه ترزی‌نین قیزی زیبب ترزی (د. ۱۹۴۰) ایله ائولندی. ۱۹۹۴ ایلینده محمد اورخان عثمان‌اوغلو‌نون اؤلومو اۆزرینه عثمانلی خاندانی‌نین رئیسی اوْلدو. بو وظیفه‌نی داشیان ارتوغرول عثمان عثمانلی ایمپیراتورلوغو زامانیندا دوْغموش کیشی اوْلماسی نه‌دنی ایله "سوْن عثمانلی" دیه آنؽلؽردی. عاییله اۆیه‌لری اوْنو عثمانلی خاندانی پروْتوْکوْلونا گؤره دؤولتلی نجابتلی عثمان ارتوغرول افندی حضرتلری اوْلاراق خیطاب ائدیردیلر. آخیجی بیر شکیلده تۆرکجه، اینگیلیسجه، آلمانجا و فرانسه‌جه بیلیردی و ایتالیانجا دانیشا بیلیر، ایسپانیولجا آنلیا بیلیردی.

ارتوغرول عثمان عثمان‌اوْغلو ۱۹۷۴ ایلینده دؤولت طرفیندن تورکیه‌یه قاییدماق اۆچۆن عفو قراری آلیندیقدا، عاییله‌نین دیگر اۆیه‌لرینه باخاراق، ایلک دفعه ۱۹۹۲ ایلینده تورکیه‌یه گلدی. ۲۰۰۴ ایلینده‌ده تورکیه جومهوریتی وطن‌داشلیغی‌نی آلدی و نیویورک منهتن‌ده یاشاماغا دوام ائتدی. ۲۳ سپتامبر ۲۰۰۹ تاریخینده ایستانبولدا بؤیرک یئتمزلیگی نه‌دنی ایله تداوی گؤردوگۆ آمریکان خسته‌خاناسیندا ۹۷ یاشیندا ایکن حیاتی‌نی دگیشدی. ۲۶ سپتامبر ۲۰۰۹ تاریخینده سولطان احمد مسجیدی‌ندن قالدؽرؽلان جنازه‌سی، دؤولت قراری ایله ایکینجی محمود توربه‌سی کوْمپلکسینده دفن ائدیلدی.

ارتوغرول عثمان عثمان‌اوْغلونون ایکینجی محمود توربه‌سی کوْمپلکسیندکی مزاری.