فیتیله وئرلیشینده تۆرکلره قارشی ایهانت

۱۳۹۴-جۆ ایلی قیروو (آبان) آیی‌نین ۱۵-جی گۆنونده، فیتیله وئرلیشینده کی بیر آشاغیلاییجی تئاتردا، آذربایجان تۆرکلری آغیر شکلیده تحقیر اوْلوندولار.

ایهانتین آچیقلاماسی

ماجرا بیر هوتلده باش وئریر. بۇ تئاتردا، بیر تۆرک آتا و قیرمیزی کؤینک گئیمیش اوْلان اوْغلو هوتلی، فارس و تورک دیللرینده اعتیراض ائده‌رک ترک ائتمک ایسته‌ییرلر، هوتلین مۆدورو اوْنلارا یالواراراق بیزیم هوتلدن گئتمه‌یین دئمک‌له، اوْنلاردان راضی اوْلمامادیقلاری و راحاتسیزلیقلاری‌نین نَدَنینی سوْروشور. آتا و اوغلان «سیزین هوتلینیز چوْخ پیس قوْخودوغو اۆچون بۇردا قالماق اوْلمور» دئییرلر. هتلین مۆدورو (فارس اوْلدوغو اۆچون) چتینلیکله تۆرک دیلینده دانیشاراق، چوْخلو سوْرغو سوْروشاندان سوْنرا، تۆرک اوْغلان دیشی‌نی دیش فیرچاسی ایله یوْخ، بلکه تۇالت فیرچاسی ایله میسواکلاماغینی باشا دۆشور.

ایهانته قارشی اعتیراضلار

بۇ ایهانتلی وئریلیش یاییملاناندان سوْنرا، توْپلومسال (اجتماعی) شبکه‌لرده تۆرکلر و باشقا مدنی چالیشقانلار بۇ ایهانته گئنیش صورتده اعتیراض گؤستردیلر. اعتیراضچیلارین نظری اساسیندا بۇ تحقیر ۱۳۸۵-جی ایلینده‌کی سۇسک کاریکاتوروندان دا داها آغیر تحقیر و توْهین ساییلیر. اعتیراضلار اساسیندا ۴۸ ساعات ایچینده آذربایجان-ین آدلیم شخصلری ، مدنی قوروملار، اۇستاندارلاری و میلّت وکیللری‌نین چوْخو، عکس العمل گؤستریب فیتیله‌ده گئدن تحقیری محکوم ائتدیلر
اعتراضلارین خبرلری گئنیش یاییلماقلا، وئرلیشی حاضیرلایان و یؤنتمنی اؤزو عۆذر ایسته‌دیلر. رادیو و تلویزیون قۇرومودا رسمی بیر بیانیه‌ده، آذربایجان خالقیندان عۆذور ایسته‌یه‌رک، او وئریلیشده‌کی تئاتری سهوی بیلسه ده فیتیله وئریلیشی‌نین هله‌لیک دایاندیریلماسی، وئریلیش سوروملولار توبیخ اوْلونمالاری، و ایکینجی کانالیندا یاییم(پخش) مۆدورونون جانشینی‌نین ایخراج اۆلماسینی سؤیله‌دی. بۇ عکس العمللره رغماً، سایتلار و توْپلومسال (اجتماعی) شبکه‌لرده یاییملانان نظرلر و یازیلار بۇ تئاترین مؤحتواسینی سهوی بیلمه‌ییرلر و اعتیراضا داوام ائدیرلر. رادیو تلویزیون قۇرومونون باشقان یاردیمچی‌سی، کانال ایکی‌نین گئجه ساعات اوْن خبرینده جانلی یاییمدا عۆذر ایسته‌ییب دئدی:

یاییملاماق و تولید یاسالارینی یئنه‌ده گؤزدن کئچیردیب دۆزه‌لیش ائدیریک. موتخلّیفلری شیدّتله جزالاندیراجاغیق. من ایراندا یاشایان بۆتون آذری دیللیلر، همدانلیلار، زنجانلیلار و بۆتون تورک دیلینده دانیشانلاردان عۆذور ایسته‌ییرم.

فیتیله‌نین تۆرکلره قارشی گؤستردیگی آشاغیلاما، آذربایجان جومهوریتی و تۆرکیه مئدیالاریندا دا یاییملانیبدیر.

فیتیله وئرلیشین ایهانتینه قارشی مدنی تظاهراتلار

همین ایهانته قارشی اوْلاراق ۱۳۹۴-جۆ ایلین قیروو آیی‌نین ۱۸-جی گۆنونده تبریز، اورمیه، اردبیل، زنجان، ماراغا، سولدوز، تهران، خیاو و... دینج و مدنی تظاهورات کئچیریلدی. بعضی شهرلرین تظاهوراتلاری اینتیظامی قۆوّه‌لرین مۆداخیله‌سینه گؤره، شیدّت و چاتیشما باش وئریب، توْپلومسال شبکه‌لرده یارالانان اعتیراضچیلارین گؤرونتولری پایلاشماقلا بیرلیکده اۇلوسلار آراسی سایتلار و خبر آژانسلاریندا دا بۇ خبرلر یاییلمیشدیر.