بارماق اویونو
بارماق اويونو - آذربايجاندا ان چوخ يازقاباغي (بايرام قاباغي) گونلرده اساساً اوشاق و گنجلر آراسيندا، گئنيش شکيلده اوينانيلان قديم اويونلاريندان بيريدير.
عومومي معلومات
[دَییشدیر]بو اويون بعضي بؤلگه‌لرده "ساناما" ،"بارماق سانادي"، بعضي بؤلگه‌لرده ايسه "ايينه-ايينه" آدلانديريلسادا اساساً "بارماق اويونو" آدلانديريلير.
اويونون قايدالاري
[دَییشدیر]بير نئچه اوشاق جمع اولوب ساناما يولو ايله اوستا(باشچي، يا موللا) سئچيرلر.
اوشاقلار اللريني آچيب اوز اوسته يئره قويورلار. سونرا اوستا(باشچي، يا موللا) آشاغيداکي سؤزلري دئيير و هر بارماغين اوستونه بير هئجا(کلمه) ايله ايشاره ائدير.
ال-ال- الـله‌نه .
سن وورگينن چپنه،
الدن چيخدي کپنه،
شاه، شوخ، شاها باجي،
موللا دئدي، چک اليني.
بعضاً اللري يئره قوياندان سونرا اوستا(باشچي، يا موللا) يوخاريداکي سؤزلرين عوضينه آشاغيداکي سؤزلري (ساناما) سؤيله‌يرلر:
بر، بر اينجي،
بر کشينجي،
شام آغاجي،
شاتير کئچي.
قوز آغاجي،
قوتور کئچي.
هاپپان،
هوپپان،
ياريل،
ييرتيل،
سو ايچ،
قورتول.
هانسي بارماغين اوزرينه قورتول هئجاسي(کلمه‌سي) دوشسه، او بارماق جرگه‌دن چيخار. بو ايش بوتون بارماقلارين آرادان چيخماسينا قدر داوام ائدير. اوستا(باشچي، يا موللا) آخيرا قالميش بارماق صاحيبي‌نين قولاغيندان توتوب دئيير:
راضي ها بالام راضي،
تيکيب دونونو درزي.
عابباسي وئريم خرجله،
تويون تزه‌دن باشلا.
قارغا قور،
قارغا ايسته‌ييرسن، قوش؟
اوشاق قارغا يا قوشدان بيري ايستر.
اوشاغين ايسته‌ديگي گؤيدن اوچانا قدر و يا گؤرونه‌نه قدر اوستا(باشچي، يا موللا) اوشاغين قولاغيني چکر و يئرده قالان اويونچولار ايسه اودوزموش اويونچونو تقليد ائدرلر. اوستا(باشچي، يا موللا) قوش و قارغا عوضينه ايسته‌نيلن باشقا وارليقلارين آديني قئيد ائده بيلر.
بئلجه اويون يئنيدن باشلار داوام ائدر.
