چیله‌‌‌مه (اویون)

ویکی‌پدیا، آچیق بیلیک‌لیک‌دن
پرش به ناوبری پرش به جستجو
چیله‌مه اویونو

چيله‌مه - آذربايجاندا ان چوخ يازقاباغي (بایرام قاباغی) گونلرده، ائلجه ده ديگر فصيللرده اساساً اوشاق و گنجلر آراسيندا گئنيش شکيلده اوينانيلان قديم اوشاق اويونلاريندان بيريدير.

عومومي معلومات[دَییشدیر]

بو اويونو اساساً اويونچولارين سايي چوخ اولدوغو حاللاردا اوشاقلار دسته‌لره بؤلونه‌رک اويناييرلار. لاکين اويونچولار يئترساي اولماديقدا اوشاقلار بو اويونو دسته‌لره بؤلونمه‌دن، ساناما اوصولو ايله اؤز آرالاريندا دا کئچيريلير. حتّي کيچيک ياشلي اوشاقلار بو اويونو ايکي اوشاق آرالاريندا نؤوبه ايله توپو چيله‌مکله اويناييرلار. هله اينديکي موعاصير توپلار ايستحصال اولونماديغي بير دؤورده بو مقصدله آت و ايري بوينوزلو حئيوانلارين خيردا توکوندن (يونوندان) توپ حاضيرلايارديلار.

اويونون قايدالاري[دَییشدیر]

اوّلجه دسته‌باشيلار سئچيلير. دسته‌باشي ايکي جور تعيين اولونور: يا اونلاري اويونچولار اؤزلري سئچيرلر، يا دا عوموم راضيليغي ايله (اويوندا و اوشاقلار آراسيندا موعين کئيفيتلري فرقلننلري)، چوخ حاللاردا ايسه (گر اويونچولار بير-بيريني تانيميرلارسا) پوشک و يا ساناما اوصولو ايله سئچيرلر. دسته‌لره بؤلونه‌رک اوينانيلان بو اويونو باشلاماق اوچون هالاي يولو ايله اوشاقلار دسته‌لره بؤلونورلر.

اويونا باشلامازدان اول دسته‌لر بير-بيريندن 3-4 مئتر آرالي دايانير. ساناما يولو ايله دسته‌لردن بيري اويونا باشلايير. اويونا باشلاياجاق دسته‌‌نين بير عوضوو دسته‌لر آراسيندا، تام اورتادا دايانير. ساغ الينده توتدوغو توپو آزجا يوخاري آتاراق نؤوبه ايله ساغ و سول آياقلاريندا توپ يئره دوشه‌نه قدر چيله‌يير. اگر توپ يئره دوشرسه همين دسته اویونو ديگر دسته‌يه وئرير. اويون بئلجه داوام ائدير. هانسي دسته‌‌نين اويونچوسو داها چوخ توپ چيله‌يرسه او دسته حسابدا ايره‌ليده اولار.