هيل-هيل اويونو
هیل-هیل اویونو - آذربایجاندا اساساً اوشاق و گنجلر آراسیندا گئنیش یاییلمیش ان قدیم اویونلاردان بیریدیر.
عومومی معلومات[دَییشدیر]
حاضیردا اونودولوب آرادان چیخماقدا اولان ماراقلی اویونلاردان بیری ده هیل-هیلدیر. هیل-هیل اویونو بلکه ده موقدس اوجاغی یاد تاثیرلریندن، اؤزگه‌لردن قوروماق اۆچون ایجرا ائدیلن بیر مراسیمین قالیغی اولوب، سونرادان اویونا چئوریلمیشدیر.بو باره‌ده دقیق فیکیر دئمک چتیندیر.هر حالدا، اویونو خوصوصیتلری اونون اوزاق کئچمیشلره عایید اولدوغونو گؤستریر.
اویونون قایدالاری[دَییشدیر]
بو اویوندا اوچ و داها چوخ آدام ایشتیراک ائده بیلر. اویوندا کیمینسه غلبه‌سی شرط دئییل. آنجاق بو هئچ ده او دئمک دئییلدیر کی، اویوندا هامی برابر وضعیتده اولسون.عکسینه، بورادا اویونچولاردان داها چوخ چئویکلیک گؤسترمزسه، او داها چوخ "ایشله‌مه‌لی" اولاجاقدیر. اویون، عادتاً، یازقاباغی و یاز آیلاریندا کئچیریلیر. هر اویونچویا بیر دگنک و 4-5 سانتی‌مترلیکده بیر هیل(پل) لازیملیدیر. دوز یئرده بیر چالا-مره قازیلیر و آغاجلا آسانجا ایتله‌مک اۆچون اوستوندن 30-40 س‌م اوزونلوغوندا بیر آرخجیق دوزلدیلیر. سونرا اویونچولارین سایینا گؤره همین مره‌‌نین خیردا،چالا("یووا") دئییلن چالالار قازیلیر. اویونو باشلاماق اۆچون پوشک آتیلیر، کیم گؤتورسه، اویونو او باشلاییر. ایلک اویونچو چالا‌نین آغزینداکی هیلی ایتله‌ییر. هر اویونچو چالیشیر کی، هیلی مره‌دن مومکون قدر اوزاغا ایتله‌سین، اوندان سونراکی اویونچونون آغاجی هیله دَیمه‌سین. بیری‌نین آغاجی هیله دَیمه‌ینده، او بیری اویونچولار اونو مومکون قدر برک ووروب مره‌دن اوزاقلاشدیریرلار. بو واخت هیلی ووروب اوزاققلاشدیران اویونچو جلد گلیب اؤز یوواسینا یاخینلاشمالی و آغاجینی اورا دیره‌مه‌لیدیر. دگنگی هیله دَیمه‌ین اویونچو اونو قاباقلاییرسا، هیلی ووروب اوزاقلاشدیران هیلین دالینجا گئتمه‌لی و "ایشله‌مه‌لی" اولاجاقدیر.
هیل مره‌دن اوزاقلاشدیریلیر. اویوندا ایشتیراک ائدنلرین هامیسی‌نین دگنکلری هیله دیمیشسه، اوندا مره‌دن بیر آددیم اوزاقلیقدا بیر جیزیق چکیلیر و یئنه ده نؤوبه ایله آغاجلار هیله آتیلیر.
اگر یئنه ده نتیجه آلینمیرسا، اوندا تزه جیزیق چکیلیر. اویونچولارین بیری‌نین آغاجی هیله دَیمه‌یه‌نه کیمی اویون بئلجه داوام ائدیر. بئله‌لیکله، اویونچولارین بیری ایشله‌مه‌لی اولور. اویونداکی گرگینلیگ هم ایشتیراکچیلار اۆچون، هم ده کناردان باخانلار اۆچون ماراقلی اولور. آنی سهلنکارلیق اویونچونون وضعیتینی دَییشدیریر. چونکی دگنگی هیله دَین اویونچو اونو اؤز یوواسنا واختیندا سالا بیلمه‌سه،اؤزو هیلین دالینجا گئتمه‌لیدیر. بو ایسه چوخ یوروجودور، اویوندا بیر نؤوع مغلوب اولماغا برابردیر. اویونداکی بو گرگین وضعیت، هیلی اویونچولاردان بیریسینی مره‌یه سالدیغی واختادک داوام ائدیر. آنجاق هیلی مره‌یه سالماق او قدر ده آسان دئییل. چونکی او بیری اویونچولار مره‌‌نین اطرافینا ییغیشیب هر جور واسیطه ایله هیلی مره‌یه یاخین قویمورلار. حتّی گؤیده وورب مره‌دن اوزاقلاشدیریرلار. نهایت، هیل مره‌یه سالینیرسا، اوندا اویون یا قورتاریر، یا دا گؤستریلن قایدا ایله تزه‌دن باشلانیلیر.
بو اویون "مره-مره" اویونونو دا خاطیرلادیر. "مره-مره اویونوندا آلتی نفر ایشتیراک ائدیر و آلتی چالا قورولور، اویونچولار سیرایا دوزوله‌رک چالایا داش آتیرلار. "هیل-هیل اویونون باشقا نؤوعو "پل آغاج"دیر. بو اویوندا هیلی (پل) ایکی طرفدن اوجلاری کسیلمیش 34-40 س‌م چوبوق و چالانی (یووانی) ایسه بؤیوک دایره عوض ائدیر.
