کؤشکی بالابان(اویون)

ویکی‌پدیادان، آچیق بیلیک‌لیک‌دن

کؤشکی بالابان - آذربایجاندا ان چوخ یازقاباغی (بایرام‌قاباغی) گونلرده اساساً اوشاق و گنجلر آراسیندا، گئنیش شکیلده اوینانیلان قدیم اویونلاریندان بیریدیر.

عومومی معلومات[دَییشدیر]

بیر مودّت بوندان اوّل بایرام‌قاباغی گونلرده، شنلیکلرده، ییغینجاقلاردا آذربایجا‌نین چوخ یئرلرینده، خوصوصاً آراز چایی قیراقلاریندا بؤیوک یاشلی اوشاقلار و جاوانلار دسته-دسته توپلانیب کؤشکی بالابان اویونونو اوینایاردیلار.

اویونون قایدالاری[دَییشدیر]

اونلاردان قووّتلیلری 5-7 نفر بیرینجی جرگه‌نی دوزلدیب اللرینی بیر-بیریلری‌نین چیگنینه قویوب دوراردیلار.ایکینجی جرگه 3-5 نفر اولوب بیرینجیلرین چیگنینه چیخیب دوراردیلار. اوچونجو جرگه ایسه 2-3 نفردن عیبارت اولوب ایکینجی جرگه‌‌نین چیگنی اوسته چیخیردیلار. سونرا بیر یئرده کؤشکی بالابان ماهنیسینی اوخویوب دولاناردیلار.

کؤشکی بالابان آرازا باخار،

آرازین سویو گؤزلردن آخار.

آی آراز، قورو، آخما بیر زامان،

آی بیزی اودا یاندیریب یاخان.

کؤشکی بالابان آرازا باخار،

آرازین سویو گؤزلردن آخار،

آی جانیم آراز، آی گؤزوم آراز،

سن دایانماسان، من اودلانارام..

گون باتان زامان قلبیم دارالیر،

باغریم اولور قان، رنگیم سارالیر،

باخیرام سنه هاوا قارالیر.

کؤشکی بالابان آرازا باخار،

آی جانیم آراز، آی گؤزوم آراز،

سن دایانماسان، من اودلانارام.

بو اویوندا اویونو باجارمایانلار اویوندان کنارلاشدیریلیردی. قالان اویونچولار اویونون سونونادک اویناییر. اویوندا غلبه قازانماق، ائلجه ده اودوزماق کیمی قایدالار یوخدور.

قایناق[دَییشدیر]

  • نوروز بایرامی انسکلوپدیاسی. باکی-2008 (شرق-غرب). ص.116.