رقیه کبیری

رقیه کبیری، 1341-جی ایلده دونیایا گؤز آچمیش، خوی لو یازار و شاعردیر.

یاشاییشی و ادبی چالیشمالاری

رقیه کبیری ،۱۳۴۱-جی ایلده خوی شهرینده شمس تبریزی‌نین مزارینا یاخین بیر ائوده دونیایا گلمیش؛ ابتدایی دؤوره‌سینی آذرمیدخت، راهنمایی‌نی پژوهش و دبیرستانی ایراندخت مدرسه‌سینده، اوخویوب باشا چاتیب. ۱۳۶۱-جی ایلده بهیاری رشته‌سینده بیر ایللیک دؤره کئچیریب، ۱۳۷۰ده تبریز دانیشگاهیندا علوم آزمایشگاهی رشته‌سینده تحصیل آلیب، ۱۰ ایل سینا بیمارستانی‌نین مۆختلیف درمانی بخش‌لرینده و ۲۰ ایل آزمایشگاهدا ایشله‌ییب، علوم پزشکی اداره‌سیندن تقاعده چیخیب. شعر و حئکایه لری دیلماج، آفتاب آذربایجان، سارای، بایرام، چیراق، انجمن ادبی صابر، آذرتورک، آذری، آناوارلیق، ائل بیلیمی، فردای ما، حیدربابا، سهیل، خراسان و … درگی لرینده نشر اولونان «رقیه کبیری» دن بو زامانا قدر نشر اولونان ۱۴ اثر اولوب. بو اثرلردن اون بیری حئکایه و رومان ساحه سینده و دؤرد اثر شعر و ترجمه اولاراق ایشیق اوزو گؤروب. رقیه کبیری اوتوز دؤرد ایلدیر تبریزده یاشاییر و ایکی اوغلان آناسی دیر.

چاپ اولونموش اثرلری

حیکایه و رومان

1- اوره ییم آغرییر (حیکایه توپلوسو- باکی شهرینین قانون انتشاراتینین طرفیندن نشر اوْلوب)2012-جی ایلینده نشر اوْلونوب

2- بۇ قاپی هئچ چالینمایاجاق (حیکایه توپلوسو- انتشارات یاران- تبریز)

3- ائویم (رومان) – انتشارات یاران- تبریز (ائویم رومانی 2016-جی میلاد ایلینده باکی شهرینین قانون انتشاراتی طرفیندن لاتین الفباسیندا چاپ اوْلوب)

4– آنلاین یازیلار (مکتوب فرموندا یازیلمیش یازیلاردان عبارت دیر) – انتشارات یاران- تبریز

5- ایچیمده‌کی قیز (حیکایه توپلوسو)- انتشارات یاران- تبریز

6- یئردن اوجا توْرپاق – رومان (علمی- تخیلی) انتشارات موغام- تبریز

7- دونیا قابار چالیب یولداش (حیکایه توپلوسو) انتشارات موغام- تبریز

8 ساچاقدان آسیلمیش اژدها (خانبالیق سفرنامه‌سی)، چین سفریندن یازیلار. انتشارات موغام- تبریز

9- قوشلار داها قورخمورلار (رومان) انتشارات یانار- آیدین

10- اؤزبکیستان سفرنامه‌سی، انور کتاب - تیر، 1396

11- مر آغاجی نین کهربا گوزلری (رمان)، انتشارات: «آیدین-یانار»، 1396

12- Mirra ağacın kəhrəba gözləri, Baki, Qanun nəşriyyatı, 2017

چاپا حاضر اولانلار

1- آجلیق باراتاسی (رمان)

2- ائندیم بولاق باشینا

چاپ اولان شعر اثرلری

1- تبریزیم! آل تبیمی، شعر توپلوسو، انتشارات نباتی. تبریز

2- بیر اوجاقدا ایکی کول توپاسی- اصلی کرم دن یئنی آنلاتی (اورتاق یازیلمیش شعر- رقیه کبیری و کیان خیاو) بۇ کیتاب 1392ینجی ایلده «کتاب تبریز» مسابیقه سینده اوچونجو مقامی قازاندی. انتشارات یاران- تبریز

3- دنبال چشمانت می گردم(پرویز جبرائیلین سئچیلمیش شعرلرینین فارسجا ترجمه سی) انتشارات کشمر

مقام لار

2012-جی ایلده «ماوایل» حئکایه سی، باکی شهرینده آزادلیق رادیوسونون کئچیردیغی حئکایه مسابیقه سینده، 180 اثرین ایچینده بیرینجی مقامی

1395-جی ایلده تورکیه ده کئچیریلن کاشغارلی محمود مسابیقه سینین ایران بؤلومنده «منی آگورادا یاندیرین» حئکایه نین اوچونجو مقامی

1390-جی ایلده «قار یاغیر» حئکایه سی اساسیندا قادر فریورین رئژیسسورلوغو ایله «قارال» آدلی فیلمین «پروین اعتصامی» و «سیب» فستیواللاریندا قازانیلان رتبه دن آد آپارماق اولار.